Keito: Diabierna algo pasa di 11’or di anochi a sosode un accidente basta fuerte riba e caminda di Keito na altura di Marietje Printing, mesora a pidi pa presencia di polis y ambulance cu hopi urgencia.
Hopi liher patruyanan di Noord y di Strandpolitie a yega na e sitio. Na yegada nan a bin topa cu un Kia Picanto pega contra un container di sushi y dos dama riba suela pafo di e auto. Polis a nota cu un di e damanan tabata herida y tabata keha di hopi dolor na su curpa. Mesora e polisnan a pidi pa presencia di ambulance cu hopi urgencia. Polis cera e caminda pa asina cuminsa cu un investigacion.
Un ambulance a presenta na e sitio, e paramediconan mesora a bay trata e dama cu tabata riba vloer y cu tabata kehando di dolor na su curpa, nan a prepar’e y hopi lilhe a transport’e pa hospital.
Un di dos ambulance a presenta na e sitio, pa haci un control medico cu e otro dama.
For investigacionnan a sali na cla cu e Kia Picanto tabata biniendo cu velocidad hopi halto for di pazuid bayendo direccion noord. Na dado momento e chauffeur a perde control, e la baha caminda y a hala na su man robes bay dal contra un Suzuki Swift shinishi cu tabata staciona eybanda. Despues a bay dal contra e cura di Marietje Printing, e la sigui bay dal contra un otro cura y na final a bay dal contra e container di sushi.
E pasahero tabata e dama cu tabata herida. E otro dama cu tabata tras di stuur a keda deteni pa core auto bou influencia di alcohol y pa ocasiona e accident aki cu hopi daño material.
E dama chauffeur a wordo transporta pa warda di Shaba. Takelwagen a tow e auto y a hib’e na warda di polis.
