Melvin Tromp di partido AVP a indica awe cu ta sinti e necesidad pa loke cu a ripara cu ta pasando den e ultimo lunanan aki, caminda cu Gobierno di Aruba, ta manera un cos cu a para bira un grabbelton, cu segun e politiconan Hulandes ta coba, ta saca locual cu nan kier pa e Gobierno aki bay di acuerdo pa wordo implementa contra di e pueblo aki.
Por a mira cu den e ultimo carta caminda cu a sali ta papia di 18 punto caminda cu te hasta ta papiando di bay strip tres pa cuater minister for di nan funcion. A ripara tambe cu ta papia keto bay di pidi pueblo pa tene pasenshi. Tromp a ripiti durante di e rueda di prensa e palabranan caminda cu Pueblo di Aruba no por come di pasenshi. Mester di un gobierno cu ta vocifera e dolor cu ta biba den e pueblo y locualnan cu ta tumando luga, aki ta caminda cu mester por vocifera y demostra cu bo tin e curashi pa bay contradeci locual cu no ta beneficia nos pais.
Edad di pensioen
Tromp a indica tambe cu por a ripara cu den e carta cu e ponencianan di parti di Hulanda, ta papia di un edad di pensioen di 67 aña. Por corda bon cla cu den campaña ultimo di MEP, ta corecto e mesun prome minister actual, hunto cu Glenbert Croes cu tambe ta forma parti di e gabinete, a papia prome di baha e edad di pensioen na 60. Despues a bisa cu ta un locura. A core propone pa 62 aña pa tur hende por cobra nan pensioen. AVP a bisa cu den un forma responsabel lo no por ta e caso.
Por corda tambe cu e director e tempo ey di SVB ainda a bin cu un tabel, caminda cu a presenta esaki den Staten y a bisa cu e fondo aki ta un fondo intocabel. No por mishi cu e edad di e pensioen, pasobra esaki lo ta bay tin un consecuencia cu despues di e prome tres luna, lo bay haci cu e fondo aki ta bay cay den un debe cu lo haci cu esaki lo sigui bay den un desaroyo negativo, caminda cu e por te hasta yega na bati bancarota pa loke ta e fondo.
Por a ripara awo cu locual cu locual cu Hulanda a bin ta exigi pa implementa na Aruba, tin un silencio hermetico riba e parti aki. No ta sinti cu e mesun palabra cu a wordo uza den campaña di MEP, ora cu a bisa cu e pensionado lo bay wordo trata den un forma clasico y esaki awo, no ta e caso.
Nos autonomia
Por a compronde hasta ora a papia di loke ta nos autonomia cu ta algo hopi serio. Un punto cu te hasta a crea un discordia riba dje, na momento cu a bay busca modo pa venena e pueblo di Aruba, bisando cu Mike Eman ta cla pa entrega e autonomia di pais Aruba.
E tempo ey a crea un discordia. A bay haci un desaster na e edificio di Parlamento, lubidando cu locual cu por ta bo a pensa e tempo ey pa dirigi contra Mike Eman cu su gabinete. No mester lubida, cu dos di e integrantenan di MEP, ta esunnan cu a bay pidi politiconan Hulandes, pa “grijp in” contra Mike Eman.
Esakinan ta bon pa ripiti, pasobra e forma di gaña pueblo, e forma pa crea veneno contra di politiconan cu a mira mas bien e interes pa crea oportunidad cu no solamente lo bay crea oportunidad di trabao, pero tambe a sigura diferente instancia cu tin fondonan cu mester a wordo proteha, esaki a tuma luga. No mester lubida tampoco palabranan di ex prome minister Nelson Oduber, cu a bisa, “Laga e otro gobierno bin, bin wak con lo nan por drecha e situacion di e pais aki.”
Na e momento cu e gobierno di AVP a yega pa asumi responsabilidad na 2009, tabata tin un fondo di pensioen na rand di bancarota cu 65% di dekkingsgraad, tabata e motibo cu a bay over na crea oportunidad. AZV tabata tin problema. SVB cu un debe astronomico. A crea oportunidadnan di trabao. A bay den barionan pa asina eleva e calidad di bida, pa duna un incentivo pa loke ta regarda henter e proceso pa bay over na tin hende cu ta contribui, no solamente cu nos economia, pero tambe den e fondo di SVB.
SVB
SVB despues di un tempo corto, a sali bisa cu e maneho tabata uno productivo, pasobra hasta a bisa cu entre 4 y 5 mil trahado nobo tabata contribuyendo cu e fondo aki.
All in all, si mira tur e problemanan cu tabata tin, desempleo cu tabata para na -15%, poder di compra cu a bay atras casi 25 pa 27%, ta esey tabata locual cu a para p’e y duna e pensamento pa bay wak con ta bay stabilisa e pais aki, duna otro oportunidadnan pa asina aki den tur angulo, esaki lo tabata un win win situation. Awe por mira cu ainda tin politiconan cu ta busca manera pa bagatelisa e realidad, al respecto pa loke tabata e situacion financiero.
Megadebe no a existi
CBS despues di dos aña, a bin reconoce, cu locual e integrantenan di partido MEP y por ta otro partidonan tambe tabata bisa di e Megadebe, no tabata existi.
Pa loke ta e debe di nos GDP, nunca a yega 90%. E tabata entre 73 y 75% y tabata un cifra indicativo. Pero no a ripara cu inversionnan cu a wordo haci, ta inversionnan cu tabata tey mas bien pa sirbi e comunidad aki den su totalidad, sin importa color politico, pero ta cosnan cu tabata tin mester di haya atencion.
Awe por sinti cu nos pais ta den un limbo, caminda cu no tin liderasgo. Por mira tambe cu cada bes tur dia, tur siman, ta bin mas punto pa loke ta pensamento di politiconan Hulandes, pa motibonan cu ta suministra prestamonan riba tereno di finansas, ta keda bin cu mas punto di condicion. Ta sinti cu tin un debilidad enorme ta tumando luga, pasobra no tin ningun reaccion di parti di e gobernantenan aki. Ta manera algo cu nos pais a para bira un cos di washi washi, pasobra kico cu bin cun’e, ta tum’e boca keto y no ta studia locual cu ta bay ta e retorno pa e pueblo aki.
Con cu bay bin, tur loke cu implementa riba e pais aki, ta e pueblo ta esun cu lo bay carg’e. Ta haci un apelacion cu por fabor, si bo ta sinti cu bo tin e debilidad, bo no tin e conocemento con pa por yega na solucionnan, con pa contradeci locual cu no ta bay beneficia e pais aki, protehando asina aki nos autonomia.
A tend’e den campaña, ora cu a papia cu ta bay percura pa defende y sali na defensa di nos autonomia, awe lamentablemente ta contrario di locual cu por a mira of tende den campaña.
Ta haci un apelacion cu si ta sinti cu tin e debilidad, no tin e concoemento con pa haci esaki, por fabor, pueblo eyfo ta sinti cu dia pa dia nan ta wordo mas hundi y cu e gobierno aki tin cu saca su conclusion. Locual cu tin awor aki ta un tipo di debilidad enorme pa hendenan cu no tin e capacidad pa goberna un pais.