Oranjestad, Aruba – Actualmente tin 121 Centro di Cuido y Guia di mucha of cariñosamente yama, crèche y traimerdia, registra na Fundacion Pa Nos Muchanan (FPNM). Esaki ta un grupo grandi di persona cu ta cuida y guia nos muchanan diariamente. Nan ta hunga un rol importante den lantamento di nos muchanan. Nos crèchenan y traimerdia ta eherciendo un trabou sumamente importante y delicado, ya cu nan, hunto cu e mayornan, ta lantando nos futuro generacion. Pa e motibo aki ta asina importante pa e Ley di Kinderopvang wordo implementa.
ENCUESTA NACIONAL
Pero, prome cu esaki tuma lugar, nos mester di dato di e situacion actual di tur crèche registra na FPNM. Pa tin un bista di esaki, e Stuurgroep cu ta encarga cu e preparacionnan pa Implementacion di e Ley di crèche, lo haci un investigacion bou tur crèche registra na FPNM. Durante e investigacion aki nos lo haci diferente pregunta na e cabesante of e persona encarga, por ehempel: riba e cantidad di mucha pa lider, cuanto lider tin un carnet valido di EHBO/CPR, kico ta e estudio mas halto di e lidernan.
MANUAL DI REGULACION DI CENTRO DI CUIDO DI MUCHA
E Manual di Regulacion di Centro di Cuido di Mucha (Handleidingsvoorschriften Kinderopvang)ta e documento oficial cu tin tur e criterianan cu e Centronan mester cumpli cu ne y tambe tin informacion tocante e “overbruggingstermijn” cual ta indica dentro di cuanto tempo e centronan mester cumpli cu e criterianan. “Mi mester bisa acerca cu e ‘overbruggings termijn’ ta conta solamente pa e crèchenan existente cu ta ofrece nan servicio prome cu e Ley bin na vigor. E Manual di Regulacion pa e Centronan di Cuido lo wordo uza como guia pa e investigacion/nul-meting”, Natasha Gilkes a enfatisa.
FECHA DI ENCUESTA NACIONAL
E investigacion lo cuminsa desde, dialuna 27 di juli y lo sigui te cu 14 di augustus. Tin 6 encuestado cu lo haci e investigacion aki. A manda un e-mail cu carta di informacion y tambe e manual di regulacion pa tur 121 centro inscribi na FPNM, pa nan tin un bista di e contenido di e preguntanan cu lo haci durante e investigacion. Tambe e Centronan aki a ricibi yamada di e encuestadonan pa asina traha un cita pa haci e investigacion. “Pa nos por continua cu e siguiente paso, nos mester di e datonan aki. Mi kier a tuma e oportunidad pa invita e crèchenan, cu ainda no ta registra na FPNM, pa porfabor haci esaki pa asina bo tambe por forma parti di e investigacion aki y ta informa debidamente tocante e delaster desaroyonan”, segun Natasha Gilkes. Por tuma contacto cu FPNM na 583-4247/588-0856 of [email protected].
Ta importante pa bisa cu aunke e Ley di Kinderopvang no ta na vigor ainda tin hopi centro cu ta cumpli cu mayoria exigencianan para den Ley di Kinderopvang, pero, semper tin caminda pa mehoracion y ta importante pa Aruba tin 1 regulacion oficial, cual ta haci cu tur centro para riba 1 linea y sa kico ta wordo spera di nan. Na final di e investigacion lo bin un Plataforma di e Centronan di Cuido di Mucha, unda cu nos lo tene reunion cu 6 representante di Centronan, cu e meta pa nan tambe forma parti den e trayectori di e Ley di Kinderopvang.
“Nos ta agradecido pa e coperacion di e crèchenan pa participa na e enquesta aki. Una bes cu nos tin tur e datosnan, nos lo haci un compilacion pa asina sigui cu e siguiente paso. Nos ta kere firme den e lema Educacion pa un base firme, pa motibo cu e centronan ta yuda forma e base pa un bon educacion di nos muchanan. Como Stuurgroep nos ta kere firme den e lema “Ta tuma un comunidad pa lanta un mucha”. Mayornan ta prome responsabel pa bienestar general di nan yiu(nan), pero, nos tur, comunidad di Aruba ta responsabel pa e bienestar di nos muchanan di un of otro forma”, Gilkes a termina bisando.