Ministerio Públiko ta hasi un yamada urgente na tur persona ku ainda tin but habrí, pa bin paga esaki mas pronto posibel òf pa drenta den areglo di pago.
Di e forma aki ta evitá ku e persona ta keda detené i ku e mester sinta un kastigu di prizon supsidiario imponé pa hues.
Resientemente un persona a keda detené en konekshon ku echonan kastigabel ku el a kometé fin di yüni 2020.
Entre tantu e persona aki lo por a keda poné den libertat pero na momentu di chekeo den sistema di registrashon a bin sali na kla ku e persona aki tabatin un kantidat di but habrí pa motibu di korementu di outo sin reibeweis bálido na mas ku un okashon. Den pasado Ministerio Públiko a yama e persona aki pa bin paga su butnan, pero el a laga di hasi esaki. Pa e motibu ei, Ministerio Públiko a disidí di ehekutá e detenshon supsidiario, loke ta enserá ku e persona aki lo mester keda será pa 4 siman pa motibu di no paga butnan. Evitá un situashon desagradabel asina. Paga bo butnan habrí òf drenta un areglo di pago.
Ofisina di Paga bo But ta situá na Waaigat, pariba di ofisina di Curoil riba Abraham Chumaceiro Bulevar. Orarionan di ofisina ta di djaluna pa djabièrnè di mitar di 8 di mainta pa mitar di 12 di mèrdia i di mitar di 2 di mèrdia pa mitar di 5 di atardi. Riba djabièrnè ofisina ta sera 4 ‘or di atardi.