Gerencia di Glitz Casino ta consciente cu como partner den e comunidad aki nan mester saca un man y yuda awo cu e pais ta pasando den un crisis masha grandi mes.
Hopi di e miembronan di Glitz Casino ta personanan local cu semper a mustra nan lealtad y awor cu e pueblo ta den necesidad ta mas cu logico cu Glitz Casino ta saca un man pa yuda, segun DavidOduber, Manager di e casino, a conta.
“Si bo sigui noticianan y mira rond, mundo ta domina pa covid-19 y tin hopi hende den necesidad. Kisas nan no ta mustra esaki, pero e necesidad t’ey. Management y Glitz Casino a dicidi di duna algo bek na comundad.” A dicidi di crea basket di comestible pa reparti bou di esnan mas vulnerabel den comunidad. Ta trata di basket cu ta consisti di productonan friu y cayente (dry goods)
Gerencia mes no tabatin e lista di personanan den necesidad y bin topa cu nomber di un organisacion cu ta haciendo un tremendo trabou pa yuda e hendenan di Aruba, esta Fundacion Pa Nos Comunidad. E siman aki a haci entrega di tur e materialnan na FPNC y nan lo haci e reparticion.
Glitz Casino sigur ta contento di por yuda e pueblo di Aruba y esaki no ta un novum pa nan. Ta normal cu durante aña, bou di circunstancianan normal, Glitz Casino ta haci donacion na comunidad, na diferente instancia.
FPNC di nan banda a gradici gerencia pa e contribucion cu nan ta haciendo na pueblo, pa nan por yuda famianan tin algo di come diariamente. Mescos cu Glitz Casino a yuda, tin mas instancia cu ta dunando nan un man y via nan paginanan riba Internet por mira con por duna un man. FPNC ta sigura cu nan ta percura cu ta reparti e comestibelnan den forma corecto.
Gerencia di Glitz Casino ta gradici su fiel clientenan ya cu ta pa motibo di nan patrocinio nan ta logra realisa tipo di ayudonan aki na esnan den mas necesidad.