ORANJESTAD – Durante un conferencia di prensa, Oficina di Turismo di Aruba (A.T.A.) conhuntamente cu Departamento di Salud Publico (D.V.G.) a anuncia cu un total di 108 compania satisfactoriamente a cumpli cu tur rekisito -manera stipula pa D.V.G.-, pa nan a wordo otorga e seyo di oro di Aruba Health & Happiness Code. E programa di Health & Happiness Code ta den linea cu locual e.o. organisacion mundial di salud (W.H.O. -World Health Organization) ta para p’e. E programa aki ta importante pa nos comunidad y nos bishitantenan por sinti nan sigur. Ademas e ta fungi como un medio di promocion pa e establecimentonan concerni y un punto di reconocemento pa e turista.
CEO di A.T.A., Ronella Tjin Asjoe-Croes, a hiba palabra durante conferencia di prensa caminda a anuncia orguyosamente e companianan cu ya a logra obtene e seyo maximo di Aruba Health & Happiness Code, esta e seyo di oro. E companianan aki a ricibi bishita di Dienst Warenkeuring en Hygiene (D.W.H.) caminda a inspecciona e localidad y a determina cu e establecimentonan participante ta cumpli cu tur protocol manera stipula pa D.V.G. Ta di admira cu e companianan aki ta pone e bienestar di nan empleado, clientela, comunidad y nos bishitante en general na prome luga y ta tuma e medidanan necesario na pecho pa asina percura cu tur esnan cu ta bishita e establecimentonan aki por limita cualkier transmision di e virus.
Hefe di D.W.H., Yvette Geerman, a elabora riba e diferente puntonan cu D.V.G. ta enfoca riba dje na momento cu ta inspecciona un establecimento, manera entre otro si e establecimento ta cumpli cu e rekisito manera stipula den su permiso, si e ta mantene un logboek di limpiesa y ongedierte, cumpli cu distancia social y tambe si tin protocolnan estableci pa cu higiena personal. Ta urgi tur compania cu a ricibi nan seyo di pre-check (e seyo di color) y cu ta wardando un bishita di D.W.H., pa tene bon cuenta cu e puntonan aki, como tambe loke a wordo menciona den e formulario cu cada compania a yena na inicio di e programa aki. Riba e pagina di Facebook di Aruba Tourism Authority por mira video unda ta brinda splicacion pa cu e puntonan di control.
A.T.A. hunto cu D.V.G. ta felicita tur compania cu ya a logra e seyo maximo di Aruba Health & Happiness Code y alabes ta gracidi nan pa nan dedicacion na e bienestar di nos comunidad como tambe nos bishitantenan.