Meta Corporation di e famia De Veer actualment ta lantando na Sasakiweg un centro di comercio y entretenimento cu lo carga e nomber GLORIA. E nomber aki ta asocia cu e famia De Veer y cu cine na Aruba desde 1930. E aña ey, Shon Eddie de Veer a cumpra un pida tereno den centro di Orajestad na skina di Steenweg y Kruisweg y a construi un edificio simpel di palo pa pasa pelicula. Cu speransanan den su pensamento Shon Eddie a yam’e GLORIA. Un aña despues e edificio a kima, y Shon Eddie a bolbe lanta e construccion y a bolbe yam’e GLORIA. Di 23 di Januari 1935, GLORIA a bolbe kima. Shon Eddie a bolbe construi, pero e biaha aki un edificio di concret. Shon Eddie a bolbe duna e edificio e nomber GLORIA.
GLORIA tabata consisti di cuatro muraya halto di concret cu un dak di plachi zink riba biganan di palo posiciona riba pilar di beton cu tabata un meter mas halto cu e muraya. Esaki tabata permiti aire supla libremente, y tawata fresca henter e edificio.
E siguiente 13 añanan GLORIA a pasa tur e peliculonan cu tawata produci na Hollywood y na Mexico. Durante di Guera Mundial nos por a mira te hasta noticieronan “Pathé”, aunke algun siman bieu. E dia mas glorioso den e historia di GLORIA indudablemente tawata dia cu e legendario Carlos Gardel a duna un show na juni 1935, apenas 5 luna despues di e candela.
Na April 21 di 1948 un candela feros a destrui GLORIA y loke tabata Wimco y No. 1 Store riba Nassaustraat, y e tienda di JEP Cabenda riba Waterweg. Como cu e famia de Veer ya a cumpra teatro Rialto y e edificio di Gobierno cu Gerardo (“Shon”), yiu di Shon Eddie, a converti den un di e teatronan di cine mas renombra den nos regio, GLORIA no a wordo reconstrui y e nomber a bira historia. Awor e descendientenan di Shon Eddie a dicidi di honra su memoria dunando e nomber GLORIA na e compleho na Sasakiweg.
Siman pasa mi tawatin e privilegio di haci un tour di e facilidadnan bou costruccion na Sasakiweg y mi a keda asombra..
E ta algo cu lo bo spera na ciudadnan manera New York, Chicago of London, no na un isla chikito manera Aruba. Puro luho cu style. E compleho lo tin tres teatro VIP, cada uno cu su propio menu y atendientenan. Un di nan ta e iMax cu un screen mas hanchu co dos theater “regular”, y un haltura di dos piso. E compleho lo tin dos speelplaats pa mucha, 6 restaurant comun, incluyendo Starbucks, y un di fama mundial, P.F. Chang’s. Stacionamento lo no ta un problema: GLORIA lo conta cu parkeerplaats pa mas di 300 auto.
Mi ta kita mi somber pa famia de Veer pa e inversion enorme den e gran aporte aki pa Aruba. Tur cu ta stima nos isla mester ta contento y gradicido. Mi ta aplaudi e decision pa honra memoria di Shon Eddie dunando e compleho e nomber GLORIA. Mi ta spera cu e proyecto aki lo ta exitoso, no, GLORIOSO!
LEYENA PA E FOTONA:
Meta Corp. di e famia De Veer ta lantando na Sasakiweg un centro di cine y comercio cu lo yama GLORIA, un nomber cu Shon Eddie de Veer tabata stima.
Gerardo “Shon” de Veer, yiu du Shon Eddi,e na despedida di e legendario Carlos Gardel.
Na 1948 un candela feroz a destrui Goria na Steenweg, den centro di Oranjestad.
Floorplan GLORIA Entertainment center