Home Corte Castigo di 9 luna di prison pa homber cu a mishi cu...

Castigo di 9 luna di prison pa homber cu a mishi cu su yiu di crianza menor di edad

SHARE

ORANJESTAD – Awe mainta Hues di Corte di Husticia a haya e homber A. culpable di a mishi cu su yiu di crianza y a conden’e na 12 luna di prison di cual 3 luna ta condicional. Aruba Native por a compronde cu Hues den su sentencia a bisa cu e ta declara A. liber pa e promer acusacion, esta penetra sexual di un menor di edad. Hues ta haya cu no tin prueba legal cu ta mustra cu A. a abusa di e mucha.

Hues a bisa cu e si ta haya proba, cu A. a haci actonan inmoral cu su yiu di crianza menor di edad. Hues a mustra cu e mucha a declara cu A. a hala su carson di abao y caricia su parti intimo. Na opinion di Hues, den A. su mesun declaracion, el a bisa cu e anochi ey e tabata den camber di e mucha y dos biaha a mishi cu su parti intimo. Tambe tin declaracion di otro testigonan cu a bisa kico e mucha a conta nan.

Hues a reacciona tambe riba e declaracion di A., kende a bisa cu loke a sosode tabata un accident ora el a bay tapa e mucha. Hues a bisa cu e no ta kere esey.

Hues a bisa cu esaki ta un caso hopi serio cu a conmove comunidad. Hues a condena A. na 12 luna di prison di cual 3 luna ta condicional cu 2 aña di prueba. Pa loke ta e demanda di daño, Hues a declara esaki no admisibel pasobra no tin suficiente splicacion. Hues a bisa cu por e mama di e mucha por cuminsa un caso civil.