ORANJESTAD, Aruba
Den waf di Aruba Ports Authority (APA) por a nota e barco crucero Regent Seven Seas Splendor mara den nos waf cual a yega Aruba diaranzon mainta. Regent Seven Seas Splendor a opta pa “lay up” na Aruba mientras cu e biahenan crucero ta suspendi temporalmente.
E barco a yega sin ningun pasahero y tin solamente e capitan y miembronan di tripulacion.
Manera ta conoci, tur compania crucero a suspende nan operacion voluntariamente debi na presencia di Covid-19 rond mundo. Te ainda e suspension voluntario for di Merca ta te cu September 15, 2020 y ta pendiente si despues di e fecha aki por reinicia biahenan crucero of si esaki lo wordo extendi cu un otro periodo.
Te na e momentonan aki e barco crucero tin intencion di keda den nos waf pa alrededor di un luna.
APA por confirma cu e tripulacion completo a cumpli cu tur e protocol nan di Departamento di Salud incluyendo e health screening mandatorio ora di jegada. Den e periodo cu e barco crucero ta den nos waf, lo percura cu e barco crucero mescos cu tur otro clientenan ta cumpli cu e reglanan y protocol vigente den cuadro di e normal nobo cu Aruba y mundo henter mester adapta na dje.