ORANJESTAD – Apesar cu Gobierno di Aruba a bin ta cumpliendo, tanto den e prome y segunda tranche pa ayudo financiero pa motibo di e crisis economico cu Covid-19 a causa nos pais, pa por ricibi e tercer tranche Hulanda a pone mas condicion pa por sigui yuda cu fondonan den e momento di crisis cu Aruba ta pasando aden.
Diamars ultimo Minister Xiomara Maduro tabata den un encuentro publico na Parlamento pa duna splicacion riba e condicionnan cu Reino Hulandes kier impone na e yudansa financiero cu ta wordo brinda na Aruba. Ta trata di dos Ley di Reino cu consecuencia grandi y cu ta afecta nos Pueblo, pa cual ta duna Aruba solamente 4 dia pa tuma un desicion.
Gobierno hulandes ta malusa e situacion fragil di Aruba su situacion financiero y economico na man di e crisis di likidez cu COVID19 a trece nos Pais aden, pa asina obliga Aruba bay di acuerdo pa introduci reformanan grandi. Banda di esaki kier obliga Aruba pa bay di acuerdo pa introduci un entidad ekipa pa solamente experto Hulandes, pa tuma decisionnan cu ta toca autoridad di Gobierno y Parlamento di Aruba.
Lamentabel ta cu no por a comparti e documentacion cu Parlamento y Pueblo di Aruba ya cu tanten cu nan no wordo trata den Conseho di Minister di Reino e documentonan aki ta cay bou secrecia pa cual su divulgacion por wordo penalisa. E manera di proceder aki den Reino Hulandes ta ‘respectloos’ y ta ‘Koninkrijk onwaardig,’ y pesey e abuso aki mester a wordo exponi pa Parlamento y Pueblo di Aruba por ta na altura di esaki.
Despues di varios consulta diahuebs mainta Parlamento a yama Gobierno pa asina pone e documentacion di e condicionnan di Conseho di Minister di Reino ‘ter inzage’ pa Parlamentarionan por tuma nota di kico ta locual ta spera Gobierno di Aruba pa bay de acuerdo cune promer cu por haya fondonan pa brinda yudansa na momento di crisis.
