Den pasado y tambe actualmente na Aruba nos ta gusta tuma trendnan over for di exterior.
E biaha aki nos lo trata un topico cu e tempo aya tabata rond mundo masha in, cu ta wordo yama Streakers.
Streaker ta ora un persona ta kita full su paña y ta core sunu den cayanan druk. E motibonan pakiko e ta haci esaki; ta pa pret, djis pa pone hende hari y tambe pa shock otro hendenan cu ta canando riba e caya pa nan zundra y rabia.
Na 1974 e fenomeno aki tabata casi tur dia den noticianan internacional. Na tur parti mundo tabata sali den noticia cu hendenan tabata wordo sorpresa pa un streaker.
Aruba no por a keda atras den esaki, riba diasabra 6 di April 1974, dos homber a dicidi di kita nan paña y core sunu den Nassaustraat ( actualmente Caya Betico Croes)
Hopi hende ainda por corda e tempo bon di Nassaustraat, con druk tabata riba un diasabra atardi. Turistanan y localnan tabata haci compras, bishita bar, para na skina di caya, algun midiendo caya, canando ariba bou, sin lubida e autonan cu tabata keda pasa varios rond den Nassaustraat. Hopi movecion tabata tin e tempo ey den Nassaustraat.
Nassaustraat, Oranjestad: Diasabra den careda di 4’or y mey di atardi, e orario mas druk den Centro di cuidad. Dos hoben masculino a dicidi di kita nan paña y den trahe di Adam a dicidi di core den Nassaustraat bay abou.
Na altura e tempo ey Spritzer & Fuhrmann nan a drenta den Hendrikstraat caminda un Volkswagen Blanco lo tabata warda ribanan. E dos hobennan aki a subi den e auto y a desaparece. Tabata tin un sospecho fuerte cu e dos hobennan aki tabata macambanan di Kemp (manera nan tabata wordo yama).
Hopi lihe central di polis a wordo bombardea cu un avalancha di yamada. Hendenan rabia cu tabata den caya, cu a presencia e acto aki y mesora a avisa polis. Hopi lihe polis a yega den Nassaustraat, pero ya e dos hobennan aki a baha na awa caba den un Volkswagen blanco.
Na momento cu polis a yega den Nassaustraat enberdad nan a bin topa cu un grupo grandi di hende hopi rabia y algun den shock ainda, nan tabata na zundramento. Nan a splica polis cu dos homber den trahe di Adam a haya ta bon pa core den caya grandi.
For di e combersacionnan polis a bin haya sa cu ta trata di dos hoben hulandes, parce mariniers. Nan a splica polis cu un di e hobennan tabata blond, pero tabata tin poco cabey cora. E otro tabata tin un petchi preto bisti, ambos a core cu nan paña bou brasa y den Hendrikstraat nan lo a subi den un Volkswagen blanco y tambe un Subaro blauw lo tabata tin algo di haber den e acto inmoral aki.
Segun e personanan cu polis a papia cu nan, kemen cu si e dosnan aki a keda poco mas ta core sunu den caya grandi, nan lo a haya un bon bati crioyo. E tempo ey e hendenan no tabata aprecia tipo di jokenan aki. Nan tabata hay’e algo di falta di respet. Algun hoben local a cuminsa bisa polis cu si nos bebe poco di mas nos SI ta wordo mesora deteni y benta den cel. Pero esakinan si no lo wordo castiga pa e hecho baho aki.
Polis a bay check e number di auto enberdad e auto ta registra riba nomber di un korporaal, pero e korporaal a bin cu un storia cu diasabra atardi e tabata na beach dilanti Divi Divi hotel. E straño tabata cu varios persona a duna polis e mesun number di auto y tur a bisa tambe cu homber tras di stuur tabata tin barba y enberdad e korporaal tambe tabata tin barba. E leiding di Marinierskazerne y polis a keda di sigui cu un investigacion. Mas sigur lo tabata trata di un joke of un bet di e mariniersnan hoben.
Na Aruba ta prohibi di cana sunu riba caya, un hende mester tin suficiente paña bisti pa cana riba caya.
Durante e investigacion a bin sali na cla, cu enberdad tabata trata di e auto di e Korporaal pero e mes no tabata na altura cu su auto a wordo usa pa e mariniersnan aki por a cumpli cu enberdad un bet.
Con a para y ken tabata e streakersnan te awe nos no sa, muy probablemente ora cu Savaneta Kemp a haya sa, nan lo a mandanan bek Hulanda?
foto: Amigoe di Curacao