Y no a resta nada mas pa wordo entrega aworaki
Parlamentarionan di AVP un cos cu nan por bon ta lubida loke nan a causa e pais aki. Partido MEP a tuma nota un biaha mas di manipulacionnan di berdad cu ta biba den cada integrante di e partido berde. No ta pornada nan a sinta den klas den e Scol di Corupcion di AVP. Den e caso aki, nos por menciona Parlamentario Mervin Ras Wyatt kende tin cara pa bisa cu Gabinete Wever-Croes a entrega autonomia financiero di nos pais.
Ta tempo pa e integrantenan riba e lista berda haya les di sinceridad of un cura pa nan amnesia. AVP mester realisa cu ta nan mes, na aña 2014, a entrega e autonomia financiero di nos pais y awo no tin nada mas pa entrega.
Nos ta corda cu na juli 2014, Mike Eman a acepta CFT pa investiga e presupuesto. A acepta tambe adelanta cu e lo sigui tur e condicionnan y recomendacionnan di CFT mientras cu e tempo ey ni sikiera tawata tin un ley pa haci esaki. Asina mes, Mike Eman a doblega y a entrega nos autonomia financiero.
Na 2015, Mike Eman a bin cu e ley di LAFT na unda cu e ta pasa e autoridad financiero di Parlamento pa CAFT. Completamente, Fraccion di AVP a sostene e ley aki, apesar cu pueblo a protesta, apesar cu sindicatonan a vocifera cu nan no ta di acuerdo, Fraccion berde, incluyendo Mervin Wyatt Ras, no a scucha ni pueblo ni sindicato, y a sostene e ley y e ley a pasa toch.
Ta bon pa AVP realisa y acepta cu ta nan a entrega e autoridad financiero di nos pais y no a resta nada mas pa wordo entrega aworaki.