Home Local Arubianonan deteni na Venezuela a yega Aruba diabierna anochi

Arubianonan deteni na Venezuela a yega Aruba diabierna anochi

SHARE
Oranjestad – Diabierna den oranan di atardi noticia a cuminsa circula cu e tres Arubianonan cu tawata deteni na Venezuela a wordo laga den libertad, y nan tawata na caminda pa Aruba.

Esaki a sosode via lama.

Nos tur por corda cu den luna di maart ultimo e tragedia a pasa, unda cu e tres hombernan aki hunto cu Paulus Martijn a bay pisca.

Esaki tawata ariba un diasabra anochi, momento cu e tres cabayeronan aki a drenta bek na San Nicolas y bati alarma cu un compañe di nan a perde ariba lama.

Algun dia despues a surgi un informacion cu lo a localisa Martijn, y ariba e dia ey e tres personanan aki aparentemente lo a sali direccion Colombia pa busca Martijn.

A surgi na tera un confusion lamentabel pa e famia, cu tawata na Zeerover wardando. Pa despues haya sa cu no ta berdad.

E dia eynan e tres piscadonan no a regresa Aruba mas, unda cu a haya informacion cu nan lo a wordo deteni pero no na Colombia sino na Venezuela.

E cambio a wordo haci ariba lama entre Venezuela cu Aruba, o sea Coast Guard Venezolano a pasanan over pa Guarda Costa Hulandes. Debi na lama bruto a tarda poco pa yega Aruba.

Diabierna anochi nan a yega Barcadera, unda famia y tambe DVG tawata wardando nan.

Pues un caso bastante fastioso, unda cu nan a wordo aresta y cera pa algun luna na Venezuela.