Parlamentario di AVP, Mike de Meza cada biaha cu e habri su boca, no solamente e ta papia disparate pero e ta mustra tambe den cua scol el a sinta den su careda politico y sin keda sinta un biaha. Ta solamente ora bo ta bin di e SCOL DI CORUPCION cu yama AVP, bo por papia di tanto corupcion pero solamente Mike de Meza ta plak corupcion na otro enbes di pone e seyo di corupcion cu su Scol di Corupcion a entregu’e riba su diploma riba su actonan di corupcion.
Partido MEP a tuma nota cu un biaha mas Mike de Meza, ta bruha tera bisando cu Gobierno aki a duna exoneracion di 320 miyon florin na Citgo y cu nos Gobierno a entrega nos autonomia. Pero, cu poco palabra, Partido MEP por hiba Mike de Meza den un otro nivel di klas, uno di integridad, honestidad y bon gobernacion sperando cu e biaha aki Mike de Meza por compronde cu no ta tur gobierno ta mesun corupto cu e gobierno cu el a sostene.
Nos Gobierno, Gabinete Wever-Croes no a duna exoneracion na Citgo y tampoco nos Gobierno a entrega nos autonomia. Esaki e Gobierno anterior a haci caba y no a resta mas autonomia pa entrega!
DEAL CORUPTO DI CITGO:
Mike de Meza, su Scol di Corupcion a siñe bon bon con pa manipula berdadnan cu no ta conbini’e pa pueblo sa of e ta practica amnesia. De Meza ta lubida cu e deal di Citgo haci pe mes y su Partido ta un deal hopi corupto. Tur esnan cu Mike de Meza a negocia cu nan, ta cera den prison pa motibo cu nan a cumpra oficialnan publico pa haya nan dealnan den otro paisnan. Esaki na Aruba lo no tawata mucho diferente. Nos tur a tende e storianan di regalonan entre otro Rolexnan cu Roberto Rincon a cumpra pa e ministernan di AVP. Nos tur a tende di e biahenan di placer pa Huston cu Roberto Rincon a paga pa e mandatarionan di AVP. Y nos tur a tende di e 300 miyon dollar cu Citgo a manda pa Aruba pero esaki nunca a yega den e refineria sino a desaparece den saco di algun hende cu a bay e Scol di Corupcion di AVP.
EXONERACION:
Ta cu ki cara a graduado di Scol di Corupcion di AVP aki awo ta cana inventa cu Gabinete Wever-Croes a duna exoneracion di 320 miyon florin na Citgo? Ta solamente un hende cu a pasa den e Scol di Corupcion aki por bisa algo asina. E Gobierno di Gabinete Wever-Croes no a exonera nada pasobra pa cuminsa no tawata tin nada pa exonera tampoco. Pero… manera tur mentira y manipulacion tin un pero su tras…. Mike de Meza a cera un deal cu Citgo cu por a costa pais Aruba 300 miyon dollar. Gabinete Wever-Croes a libra Aruba di e claim di 300 miyon dollar aki y tur e riesgonan cu Citgo tawata biniendo cu n’e y crea oportunidadnan nobo pa Aruba.
AUTONOMIA FINANCIERO:
Pa loke ta trata e manipulacion cu De Meza ta bisa cu Gabinete Wever-Croes a entrega nos autonomia financiero, Partido MEP tin un cos so pa bisa de Meza: Corda cu na 2014, ta Mike Eman mes a entrega autonomia financiero di nos pais apesar di tur conseho y desacuerdonan.