Oranjestad: Diabierna den Corte di Husticia di Aruba, Hues a baha pisa riba un grupo cu a comete un serie di asalto arma, tabata trata di e hombernan T.P., A.B., N.S., S.F.y M.C. por medio di un video conference e personanan aki a scucha nan sentencia.
E grupo aki a wordo acusa di 6 asalto arma. E caso a wordo trata algun siman pasa caba, den cual tabata sospecha cu e grupo aki a comete un serie di asaltonan arma, en total 6 asalto arma na Supermercadonan Chines. A sali na cla cu no ta tur e personanan aki a participa na tur e 6 asaltonan. Pa e motibo aki Fiscal no a exigi e mesun castigo pa tur.
Fiscal a exigi castigo di prison di ; 14 aña pa T.P., 11 aña pa A.B. , 8 aña pa S.F. , 8 aña pa M.C. y 6 aña pa N.S.
Hues a haya e grupo aki culpabel di e asaltonan arma na e 6 supermercadonan. Hues a haya cu e casonan aki ta hopi serio, pa motibo cu tur e victimanan a keda hopi traumatisa. Tambe e la tuma nan na malo, pa motibo cu a usa violencia y e asaltonan a sacudi henter e comunidad di Aruba.
Hues a dicta e siguiente sentencianan;
T.P. a wordo haya culpabel di tur 6 asalto arma y a wordo condena cu 12 aña di castigo di prison.
A.B. a wordo haya culpabel di 3 asalto arma, cual di un ela wordo declara liber, teniendo na cuenta cu e la coopera cu e investigacion, e la wordo condena cu 6 aña di castigo di prison.
N.S. a wordo haya culpabel di dos asalto arma, caminda a menasa hende cu arma. Na un Pool bar a usa violencia pisa. N.S. a wordo condena cu 5 aña di castigo di prison.
S.F. a wordo haya culpabel di 3 asalto arma, e la admiti su culpabilidad y a bisa con tur a sosode. S.F a wordo condena cu 7 aña di castigo di prison.
M.C. a wordo haya culpabel di 2 asalto arma, e la participa tambe na e asalto cu violencia na un Pool bar. M.C. a wordo condena cu 6 aña di castigo di prison.