ORANJESTAD – Nos a pasa un periodo sin ningun caso nobo di COVID 19 raporta na Aruba. Cu esaki tambe a nota cu en general nos comunidad a tuma un posicion relaha cu protocolnan di prevencion estableci pa e Crisis Team rond di nos isla. Locual nos mester realisa ta cu COVID 19 no a bay, cu nos meser siña biba cu e hecho cu e ta bay t’ey cu nos pa un rato y cu nos mester adapta nos comportacion mas liher posibel pa asina preveni cu esaki ta bira un problema pa nos tur.
Teniendo na cuenta cu ariba Juni 29, 2020 Aruba ta raporta dos caso nobo di COVID-19, y cu frontera di nos pais a cuminsa habri pa bishitantenan, Colegio EPI kier pidi un y tur cu ta bishita nos campus pa atene na e protocolnan di prevencion estricto estableci. Nan t’ey pa proteha tur hende nan salud. Esakinan ta inclui mantene distancia di 1.5 meter di otro, niester y tosa den elleboog, laba man frecuente, uza handsanitizer vooral promer cu drenta cualkier un di nos espacio na skol y respeta e marcanan riba vloer y bankinan publico rond di campus. Tambe ta haciendo control di temperatura rond di campus y ta pidi un y tur nan cooperacion pa permiti esaki tuma lugar.
Contribuyendo na prevencion y proteccion di salud di nos personal, Colegio EPI ta implementa un medida adicional. Entrante Diaranzon Juli 1, 2020 tur persona, sin distincion, cu kier uza un di nos servicionan (manera oficina di administratie na cada unit, departamento financiero, Open Leercentrum – OLC y Stafbureau) mester tin obligatoriamente un mondkapje bisti na momento cu kier drenta den un di e espacionan aki. Na entrada di tur espacio lo mira e posternan poni riba porta. Esaki no ta un medida straño ya cu na diferente organizacion rond di nos isla esaki ta implementa caba. Nos a realisa cu como organisacion nos no tin den nos man e control directo di e comportacion di cualkier persona cu ta drenta den espacio di trabao di nos personal, pero nos por implementa medidanan adicional pa por limita e riesgo di contagio di COVID 19.
Den tur leslokaal cu ta den uzo na e momentonan aki, tin entre otro e protocol di distanciamento fisico implementa caminda e cantidad di studiantenan permiti ta keda limita y ta honra e 1.5 meter di distancia entre bankinan den e lokaal. Pa nos examen cu ainda ta sosode den e dianan aki, ta sigui observa e protocol di examen ya caba estableci y publica interno door di Colegio EPI. E ta keda ainda opcional pa tur studiante uza un mondkapje durante les of examen, pero por modifica esaki y haci’e obligatorio na momento cu no ta sigui e protocol di prevencion estableci y no tin cambio di comportacion.
Pa ta bon cla, e uzo di mondkapje no ta remplasa e protocolnan existente cu ta keda na vigor na tur momento den prevencion di contagio pa COVID 19.
Cuido di un persona su salud y evita e riesgo di keda contagia cu COVID 19 ta keda un responsabilidad individual y ta depende di actuacion y comportacion. Yuda nos na Colegio EPI cu prevencion y asina contribui na salud y bienestar di un y tur.