Home Politics Minister Glenbert Croes Nos ta un Gobierno cu semper lo t’ey...

Minister Glenbert Croes Nos ta un Gobierno cu semper lo t’ey pa nos Pueblo

SHARE

 

 

Dialuna ultimo un grupo di ciudadano preocupa cu a bin manifesta nan intrankilidad y preocupacionnan legitimo pa e hecho cu ainda nan no a ricibi FASE. E mandatario tabata abou na entrada di porta di Gobierno e momento cu e grupo aki tabata canando bin for di Parlamento. E mandatario a acepta responsabilidad pa tur e ‘fayonan’ cu por a wordo cometi den FASE y a compromete su mes na resolve esaki un pa un declarando: “Nos lo atende tur e preocupacionnan y den cuadro di e reglanan vigente lo soluciona tur e reclamonan. Nos lo atende tur e necesidadnan como ser humano y como famia paso nos ta un Gobierno cu NO ta bira lomba pa nos Pueblo.”

 

Manera e mandatario a declara na mas di un ocasion, e ta reconoce tur fayo y defecto di FASE. Pero na mes momento ta bisa e team di FASE hopi danki pa tabata sikiera dispuesto pa asumi un encargo asina importante, cu labornan sobrehumano, den pleno crisis, toque de keda, sin un manual di instruccion y den practica siñando con pa hinca FASE den otro for di cero. No ta tur cos a bay bon. Pero cu hopi satisfaccion por bisa si cu mas di 10 mil hende a haya e ayudo financiero di FASE 1 te hasta 3 biaha. Y aunke inicialmente no ta tur hende lo a bin na remarca, Gobierno constantemente a bin ta suavisando e rekisito- y exigencianan pa asina acomoda lo mas hopi hende cu ta posibel cu e ayudo di FASE. Gobierno ta reconoce tambe cu locual cu a trece hopi confusion ta introduccion di LoonSubsidie. Ademas di e confusion, hopi Dunado di Trabou a cobra loonsubsidie pa su trahadonan pa despues retiranan sin dunanan e pago di Loonsubsidie cu nan tabatin derecho riba dje. E personanan aki a keda perhudica pasobra nan a cay “tussen wal en schip”, entre barco y oriya. Atrobe FASE Helpdesk a bin ta haciendo e ehercicio pa purba acomoda e hendenan aki bek den FASE. Pero esaki ta rekeri su control debido tambe.

 

E mandatario ta reconoce cu hopi hende ta pasando hopi necesidad. Y di su banda ta purbando di tur manera pa yuda unda tur e por. P’esey recientemente el a schrap tur locual cu por tabatin riba presupuesto di su Ministerio pa e por traspasa 750 mil florin pa Fundacion pa Nos Comunidad por sigui reparti pakete di cuminda pa esunnan cu mester di ayudo.

 

Manera por wak riba portada, e mandatario a bay saluda cada un manifestante atendiendonan personalmente, notando nan datonan, pa por yega lo mas pronto posibel na un solucion sostenibel pa tur hende.