Hues a declara homber liber pa paga boet di 1000 florin pa viola “toque de queda”

El a reclama den Corte cu e tabata riba tereno di e cas y no caminda public

 

ORANJESTAD – Ayera mainta e promer Ministerio Publico a cuminsa cu e caso penal contra 23 persona cu no a paga e boet relaciona cu viola e regla di “toque de queda”. Aruba Native por a compronde cu e mayoria di personanan a pidi pa haci trabou pa comunidad pasobra door di e pandemia Corona Virus, nan no tin trabou. Tambe tabatin persona cu a pidi un areglo di pago.

Pa esnan cu no por paga, nan a wordo condena na trabou pa comunidad pa 40 ora y si nan no haci esaki, nan lo mester bay 20 dia sera den KIA.

Loke a capta Aruba Native su atencion ta e caso contra e homber F.R., kende a reclama cu e tabata riba tereno di su cas y asina mes el a wordo deteni.

Fiscal a acusa F.R. cu riba 23 Maart 2020, e tabata pafor di cas despues di 9’or di anochi, siendo cu tin “toque de queda”. Ta asina cu Polis a detene F.R. 10.15 di anochi pafor di cas.

F.R. a splica Hues cu tabata sinta pafor dilanti porta di e cas na Pitastraat riba stoel den cura di cas di un amigo. Un auto a para y el a lanta bay na e auto y a resulta cu den e auto tin Polis cu a baha cu arma. El a bisa nan cu e no a haci nada malo y cu e ta riba tereno di cas. Nan a detene y dun’e boet. El a reclama cu esaki ta inhusto. Hues a puntr’e si e por paga e boet di 1000 florin. F.R. a bisa cu e no tin trabou y coy job pero awor cos ta frega. Hues a puntra si F.R. lo ta dispuesto pa traha pa comunidad. El a bisa cu e ta dispuesto.

Fiscal a reacciona cu segun e “toque de queda”, bo mester ta den bo cas. E ta haya proba cu F.R. ta pafor di cas. Fiscal a sigui bisa cu e ta compronde F.R. no tin trabao. El a exigi 40 ora di trabao pa comunidad of 20 dia sera.

Hues a tuma decision di biaha. Hues a mustra cu segun raport di Polis, F.R. tabata den cura di cas y no riba caminda publico. Hues a bisa cu segun e ley, bo no por ta pafor di cas. Hues no ta comparti opinion di Fiscal. Hues a mustra cu cada vez tabata stipula regla si por ta ariba tereno di cas, otro biaha no te na caminda, otro biaha por ta patras di cas. Hues ta haya cu esey ta crea confusion. El a bisa cu segun ley por castiga ora tin claridad kico ta e delito. No tin claridad riba con mester keda na cas. Hues a declara F.R. liber pasobra e no tabata riba caminda publico sino riba tereno di un cas.