Stichting Reclassering en Jeugdbescherming Aruba ta bezig desde 2014 cu un proyecto yama “Mentorenproject” hunto cu boluntarionan den nos comunidad. Un proyecto pa hobenan entra 16 cu 23 anja di edad cu a haya nan mes den problema cu husticia. Den e proyecto aki ta “match” un hoben cu un mentor boluntario pa un maximo di 3 – 6 luna, asina por yuda sostene e hoben pa e logra su mentanan.
E proyecto aki a duna bon resultado y a wordo nomina pa e Appeltjes van Oranje 2020 entre un cantidat di proyectonan den Caribe y na Hulanda. Actualmente tin 12 proyecto nomina pa e premionan di e Appeltjes van Oranje 2020. Dos di Caribe y 10 di Hulanda.
Appeltjes van Oranje ta un premio anual di Oranje Fonds otorga na 3 proyecto special y inovativo riba tereno social. Proyectonan cu na un manera exitoso ta trese diferente grupo hunto y cu ta percura cu e persona ta bolbe participa den comunidad. E premio prestigioso aki ta consisti di un estatua di brons den forma di un Appeltje, traha door di princes Beatrix y un suma di placa di 15.000 euro. E premio ta wordo duna tur anja na luna di mei door di reina Maxima cu ta beschermvrouw di Oranje Fonds, como aprecio pa e trabounan y esfuerzonan di e organisationan.
Na mei ultimo Reclassering lo a viaha pa Hulanda pa e celebracion di e nominadonan na e Paleis Noordeinde na Den Haag y den esaki e otorgation di e premionan lo a tuma lugar. Pero mirando e situacion di e Covid, Oranje Fonds a busca un otro manera creativo pa haci esaki y a dicidi pa hacie via un “live-streaming” hunto cu tur e 12 organisationan nomina.
Dia 9 juli venidero pa 8 or di mainta via e live streaming lo celebra e 12 proyectonan su nominacion y Reina Maxima lo anucia e 3 ganadornan. Reclassering ta sumamente orguyoso di ta nomina cu e proyecto aki, ya cu e ta duna rehalse na e importancia di e proyecto pa nos hobenan y e importancia di boluntario den nos comunidad.
Pa es motibo nos ta cuminsa nos campanja pa busca mas mentor bulontario cu kier haci un diferencia den e bida di nos hobenan. Nos hobenan por haya den nos mes comunidad, role models cu por yudanan y mustra nan cosnan positivo den bida. Hopi biaha nan no tin esaki den nan mesun seno familiar.
Nos ta busca mentornan di 25 anja bay ariba, cu un bida stabil y ta responsabel. Cu e hoben por depende riba dje y lo por duna tempo na e hoben. Tur boluntario lo pasa un screening y un training prome cu wordo gekoppeld na un hoben.
Hunto cu e campanja nos ta orguyoso di presenta awe nos jingle nobo pa e proyecto. Nos kier a duna danki na Carl Roosberg “Galloway” cu ta sostene nos campanja y a traha e jingle aki di su Caiso ganado den carnaval 2020. Den cual e ta papia di ta un rolemodel berdadero pa nos hobenan.
Pa aplica pa ta mentor por subi nos Facebook; Stichting Reclassering Aruba y download e formulario, yena esaki y mande na nos gmail; [email protected]