ORANJESTAD – Oficina di Turismo di Aruba (A.T.A.) ta orguyoso di anuncia cu Aruba a ricibi su seyo di ‘Safe Travels’ indicando cu nos isla ta cumpli cu e protocolnan di higiena y salud estableci pa World Travel and Tourism Council (WTTC). Como un di e organisacionnan clave representando e industria turistico riba nivel internacional, WTTC a introduci e seyo di ‘Safe Travels’ pa reconstrui e confiansa di biaheronan ora di biaha den e ‘normal nobo’. E programa di ‘Aruba Health & Happiness Code (HH Code)’ como tambe tur protocol relevante na nos industria turistico a contribui grandemente na e logro aki pa Aruba. Aruba por ta orguyoso di ta e di dos destinacion den Caribe, despues di Jamaica.
WTTC ta representa sector di ‘Travel & Tourism’ mundialmente, cu un mision pa sigura cu e sector ta “seamless”, sigur, inclusivo y sostenibel. E organisacion ta crea concientisacion di e balor di e industria turistico, como un di e sectornan economico mas grandi na mundo, pero tambe ta enfoca riba e multitud di comunidad y viahero cu lo wordo afecta positivament pa via
di experiencianan di biahe. E ta un organisacion ‘non-profit’, situa na London, Inglatera, y cu un ekipo rond mundo lansando initiativanan pa crecimiento sostenibel y inclusivo pa e sector turistico. Nan estudio riba impacto economico di ‘Tourism & Travel’ cu ta mundialmente reconoci ta cubri 185 pais y 25 region. WTTC su miembrecia ta representa 60% di 1 trilyon di dollar di ingreso cual ta ekivalente na 30% di e total di e sector turistico mundial. E organisacion aki ta conta cu miembronan cu ta entre otro varios president y CEO mundialmente cu ta traha
na bienestar di e industria turistico y cu ta vocifera nan mes como un “front” na momento di trata cu gobiernonan y organisacionnan internacional.
WTTC a bin ta traha hunto cu diferente actornan pa introduci protocolnan pa cu e proceso di recuperacion di e industria turistico. Den e cuardo aki, WTTC a introduci protocolnan cu ta enfoca riba higiena y salud. E seyo di “Safe Travels” lo haci posibel pa biaheronan por reconoce e destinacion y companianan rond di mundo cu a adopta protocolnan di higiena y salud cu ta riba nivel mudial. E protocolnan aki ta tene cuenta cu protocolnan estableci pa entre otro World Health Organization (WHO) y ta enfoca debidamente riba aspectonan relaciona cu salud,siguridad y distanciamento social cu biaheronan lo mester tene cuenta cune pa cu e “normal nobo”.
Como parti di e protocolnan mara na e seyo di ‘Safe Travels’, sector publico y priva lo ricibi diferente herment pa asina guia e implementacion di e protocolnan aki pa sigura cu biaheronan ta y ta sinti sigur. E vision pa cu esaki ta pa yega na un punto caminda biaheronan ta sinti sigur durante cada momento di nan biahe pa asina disfruta di experiencianan unico.
Destinonan turistico manera, entre otro, Aruba a adopta e protocolnan di salud y higiena den linea cu locual ta rekeri riba nivel mundial, di e forma aki tambe subrayando cu e bienestar di nos comunidad y bishitantenan ta primordial.
Cu e seyo aki ta subraya cu Aruba como destino turistico ta cumpli cu tur aspecto necesario pa cualifica pa e seyo mundial aki. Tambe e ta reconoce e eficacia di e ‘Aruba Health & Happiness Code (HH Code)’ y otro protocolnan.