Riba djárason 24 di yüni 2020 a tuma lugá un manifestashon ku a eskalá i yega na sakeo i destrukshon. Durante di e situashon penoso aki a detené diferente sospechoso (34 persona riba 24 di yüni i 21 persona riba 25 di yüni). E personanan aki a hasi nan mes kulpabel na destrukshon, sendementu di kandela i robo. Kuerpo Polisial Kòrsou (KPC), Ministerio Públiko (OM) i Recherche Samenwerkingsteam (RST) a uni forsa pa identifiká e otro sospechosonan i persigui esakinan penalmente. E mensahe mester ta kla ku aktonan kriminal no ta aseptabel.
Riba e atardi di 24 di yüni, un kantidat grandi di ladron a drenta den diferente establesimentu di negoshi ku e meta pa sakea i bai ku tur e inventario di e negoshinan aki. Hopi di e sakeonan a keda filmá entre otro pa kamaranan públiko òf pa otro siudadanonan ku despues a kompartí esakinan via medionan sosial. Ademas, por rekonosé kara di e personanan responsabel pa e sakeo aki hopi bon riba e imáhennan aki. Polis lo studia e e imáhennan aki i lo publiká esakinan pa asina por saka afó ken ta e malechornan aki ta. Pa aworakí lo mustra e imáhenann aki di tal forma ku no ta mustra karanan kompleto.
Polis ta hasi un yamada urgente na e personanan aki ku a hasi nan mes kulpabel na e destrukshon i sakeonan aki pa nan entregá nan mes di forma boluntario na polis i tambe pa trese loke a bai kuné durante di e sakeo. Den kaso di e personanan aki lo evaluá posibilidat pa un areglo (‘afdoneing’) ku ta kuadra.
Personanan ku no ta duna oido na e petishon pa entregá nan mes i ku polis mes lo buska i detené, lo haña un kastigu muchu mas pisá. Den e kaso ei, den konsulta ku Ministerio Públiko polis lo bai over na publiká imáhennan kompletu di e sospechosonan. Chèns ta grandi ku e personanan aki den e kaso ei lo enfrentá un persekushon penal. Ya kombersashonnan ta tumando lugá ku Korte den Promé Instansia pa atendé e kasonan aki ku prioridat den e asina yamá ‘snelrechtzittingen’.
Finalmente, KPC, RST i Ministerio Públiko ta hasi un yamada na tur siudadano ku por ta testigu di un di e sakeonan, sendementu di kandela i/òf destrukshon, i ku tin grabashon di esakinan òf ku por ta na altura di ken ta e outornan intelektual di e susesonan aki, pa mèldu esaki na polis. Por hasi esaki entre otro pa medio di e number anónimo 108. Tambe ta posibel pa manda video òf potrèt di e susesonan riba e number di app 5242480.
E informashon aki ta bálido tambe pa susesonan similar ku a tuma lugá despé di dia 24 di yüni.