E ta obvio cu comunidad ta irita y super furioso di tur e casonan cu cada biaha ta keda presenta relaciona cu abuso sexual y fisico cu ta tumando lugar cu nos muchanan. A yega ora pa e bienestar , futuro y derechonan di nos muchanan lo tin cu bai prevalece riba cualkier derecho di e posibel abusador ora cu e presenta su mes dilanti corte. Nos kier enfatisa cu e contribucion aki ta un refleccion di nos miembronan tocante e tema. Tin sugerencianan presenta den e articulo cu lo tin cu wordo studia mas leu door di expertonan y esnan concerni.
PHP ta observa cu e lo bai tuma un combinacion di diferente accionan cu lo mester bai wordo tuma pa asina por logra frena e casonan di abuso na nos muchanan. No solamente decisionan mester bai wordo tuma relaciona cu e castigo pa posibel abusadornan pero tambe mester bai inverti tempo pa pensa riba metodonan preventivo pa minimalisa e casonan aki den nos comunidad. E ta comprendibel cu e deseo di comunidad ta pa aumenta castigo pero nos mester realisa cu esaki ta un accion cu lo ta tumando lugar despues cu ya e echo castigabel contra e mucha a wordo cometi caba. Tambe mester considera e echo cu e abusador despues di caba su condena lo ta liber bek den comunidad cu e chens atrobe di desgracia otro bidanan. Cu castigo tin cu wordo aumenta esei ta un hecho y cuanto tempo e abusador lo mester bai tras di trali ta un discussion cu tin cu wordo bon hiba den parlamento scuchando e deseo di pueblo. Djis redobla e castigo so no lo ta suficiente. Pero e bentaha di un castigo minimo ta cu no tin un margen di flexibilidad pa hues dicidi lo contrario y cu pasa loke a pasa si e abusador wordo haya culpabel lo tin cu cumpli cu e minimo di castigo prescribi den ley. Den un scenario asina pruebanan lo mester ta solido tambe pa yega na sentencia e posibel abusador.
Manera indica na comienso di e articulo aki e ta necesario pa pensa riba metodonan preventivo tambe. Nos di PHP lo kier trece dilanti e siguiente sugerencia pa e comunidad completo considera esakinan:
- A) Introduccion di un sex offenders list
- B) Introduccion di ankle bracelets
- C) Restriccion di mobilisa den area cu tin mucha
- D) Flexibilisa acceso na dossier medico ora tin sospecho di abuso
- E) Tur scol mester tin un trahador social on duty cu ta haci un assessment cu muchanan di kleuter te cu scol halto
- A) Introduccion sex offenders list
Kizas hopi lo debati riba e hecho cu introduccion di un lista asina aki lo no ta necesario of cu esun condena a haya un strafblad caba. Tambe huristanan lo debati cu introduccion di un lista asina aki lo ta empugna contra derechonan di e acusado. Den e edicion di e articulo aki nos lo nos bai den e discusion aki pasobra lo enfoca explicitamente riba e bentahanan di e medidanan aki. E esencia di introduci un lista asina aki ta pa comunidad ta bon informa di e depredadornan aki den nos comunidad. Kiermeen sib o wordo sentencia pa e delito di abuso sexual of fisico na un mucha bo ta bai riba e lista aki. E chens ta existi cu unabes esun condena pa abuso sali pasobra e la cumpli cu su condena cu e lo por bolbe ripiti esaki. Ta di relevancia pa comunidad ta informa di e personanan aki pa asina nan por cuida nos muchanan mihor ainda.
- B) Introduccion di ankle bracelets
Introduccion di ankle bracelets ki tin como bentaha cu e abusador lo ta constantemente bou monitor. Su pasonan lo wordo vigila di serca pa detecta ki ora por ehempel e ta den un area di scol of area unda muchanan ta recrea. Nos tin cu remarca cu e introduccion di esaki sigur e derechonan fundamental di e abusador lo wordo atacha, pero mescos cu nos a senjala den e paragraf anterior nos lo no bai riba e discusion aki. Otro bentaha di ankle bracelets ta cu e persona aki pa resto di su bida no por yega serca di un mucha of traha unda tin muchanan ta circula.
- C) restriccion di mobilisa den area cu tin mucha
Esun condena pa abuso di mucha tin cu wordo prohibi pa resto di su bida pa yega serca di mucha. Esaki ta sona un medida drastico, pero na e otro banda e ta uno cu por contribui na e ripiticion di casonan di abuso di mucha. Poniendo un banda e discussion huridico cu por surgi relaciona cu posibel minacion di derechonan fundamental di e abusador, tabon tambe pa tuma como un consideracion central e derecho di mucha.
- D) Flexibilisa acceso na dossier medico ora tin sospecho di abuso
Archivonan medico ta cai bou di e secreto profesional entre e dokter y su pashent cu lo ta e mucha. Pero den un caso di sospecho di abuso sexual por pensa na suavisa proceduranan pa yega mas liher cu ta posibel na e filenan aki pa por tuma medidanan riba corto plazo y evita continuacion di abuso. Kitando e debate un banda cu ta trata di filenan confidencial, lo mester considera cu e derecho di mucha tin cu prevalence.
E)Trahadornan social
Aunke varios scol ta conta cu trahadornan social , mester pone enfasis riba e hecho cu no ta tur scol tin un of e acesoria social no ta wordo practica optimalmente. Door di ekipa tur scol cu un trahador social of si acaso e scol tin un trahador social un programa di assessment pa detecta den e fase trempan basa riba e comportacion di e mucha cu tin cosnan ta sosodiendo cu no ta normal. PHP no ta posee e experticio riba e tema aki pero ta sugeri pa instancianan concerni aserca e profesionalnan aki pa tuma nan input.
E meta di articulo aki tawata pa trece algun punto den perspectiva pa comunidad por pensa y consideranan. Logicamente aumenta castigo lo bai crea un ‘shock effect’ pa e abusadornan no yega asina leu y den caso cu e abusador ta culpabel un castigo suficiente pisa por crea e impreshon cu e lo paga cu su condena pa e echo di a desgracia e bida di un mucha. Pero un biaha mas nos ta ripiti cu aumenta castigo no ta suficiente, esaki lo mester wordo combina cu varios otro metodonan preventivo. E metodonan preventivo cu nos a menciona ariba no ta un lista limitativo. Den nos comunidad tin hopi profesionalnan cu si nan wordo aserca por crea un plan hopi mas mihor cu loke tin awor. E manera con e metodonan lo por wordo implementa of di ki forma e lo ta esun dimas efectivo ta algo cu ta keda na promer lugar den man di Parlamento y gobierno di Aruba despues di e consulta tur expert riba e tereno. Pero tambe ora cu instancianan social wordo involucra por yega na tuma un decision hopi mas mihor funda y bon planea. Nos di PHP ta conciente cu aplicacion di cierto medidanan lo nifica afecta derechonan humano di e abusador. Pero na e momento cu ta trata di un mucha su futuro y derechonan tin cu prevalece riba cualkier aspecto di e abusador.
E invitacion ta pa tur hende sostene e accion dia 3 juli 2020. Miembronan di Plataforma Hobennan Profesional tambe lo sostene e accion aki.
Scirbi pa studiantenan di Ley:
Jessica Burgos, Wendrick Cicilia, Wendert Cicilia, Gerick Croes LL.B. , B.ec. , Juan Kelly & Minorca Martis LL.B.
Victoria Lopez B.A
Dorshon Salmon