Nos kier pone enfasis riba e hecho cu COVID19 no a trece cambionan den nos leynan laboral. U unico forma cu nos leynan por wordo cambia ta si esaki tuma lugar via amiendanan haci y acepta door di Parlamento di Aruba. Vooral den ultimo simannan ta den discussion kiko lo mester wordo paga na e trahador si acaso e la traha ful 100% durante e periodo cu diferente medida di prevencion tawata vigente.
Art.7A:1614b BWA ta prescribi cu no tin un obligacion pa paga salario na e trahador pa oranan cu e no a traha. Si nos lesa e articulo aki a contrario e lo nifica cu e trahador tin cu wordo paga pa e oranan cu den realidad a wordo traha. Cu otro palabra un trahador cu a traha 4 siman na 40 ora esta 100% , e lo tin cu wordo paga ful su salario. Den un scenario cu e compania a pidi subsidio di salario for di SVB y a paga e trahador solamente e 60% mientras cu e trahador a traha 100% lo nifica cu e restante di 40% lo tin cu wordo paga na e trahador. Tene na cuenta cu riba esaki no tin ningun excepcion. Si e doño di trabou no haci esaki e lo por confronta un demanda di parti e trahadory kizas hasta cu interes.
Pero kiko ta e situacion ora cu e trahador door di instruccion di e dunador di trabou wordo pidi pa keda cas? Art. 1614C BWA ta indica cu un trahador lo retene su compensacion di salario den un caso cu e trabou no por wordo haci door di un motibo cu lo cai pa cuenta di e dunador di trabou. Esaki ta nifica cu hasta den un scenario cu un trahador wordo manda cas, un dunador di trabou lo tin cu page su salario door cu esaki lo cai pa e responsabilidad di e dunador di trabou.
Covid19 a mustra cu nos leynan no tin reglamento cu ta regarda ora un pandemia manifesta su mes tampoco mucho espacio pa ta flexibel. E consecuencianan y medidanan di prevencion a pone cu comercio a shutdown obligatoriamente pa algun siman cu tur su consecuencia pa e entrada di zowel e dunador di trabou y e trahador. Door di e sucedidonan aki e tema di cambio den acuerdo laboral a bini padilanti. Varios compania a pone of trata na laga nan trahadornan firma un ‘addendum’ na nan acuerdo laboral existente.Door di agrega un ‘addendum’ na e acuerdo laboral existente lo nifica aplica un cambio na dje. Nos a señala den articulonan anterior cu un dunador di trabou no por unilateralmente dicidi pa corta den salario of haci un reduccion di e total di oranan di e trahador. E proposicion di e dunador di trabou lo mester wordo papia pa yega na un areglo cu e trahador.
Nos Plataforma ta spera di a pone suficiente enfasis riba e hecho cu oranan traha mester wordo paga door di dunador di trabou y cu den hasta algun scenario cu un trahador wordo manda cas cu esaki lo por cai pa cuenta di e dunador di trabou. Den e caso cu e dunador di trabou no paga e trahador, e trahador lo por tuma accion legal pa e wordo paga. Den caso cu unilateralmente e dunador di trabou aplica un cambio den e acuerdo laboral e lo mester deal cu e consecuencianan legal. Tienda di Ley kier enfatisa cu a trata mas tanto posibel na splica e articulonan aki den Papiamento pero no tur biaha tin palabranan huridico exacto cu por wordo usa. Ta spera cu por a informa e lector un poco tocante e topico aki. Si abo como trahador tin un pregunta specifico relaciona cubo situacion laboral nos ta invitabo haci bo preguntanan via: [email protected] of nos fb page.
Scirbi pa studiantenan di ley:
Wendrick Cicilia
Gerick Croes LL.B. , B.ec.