Home » Historia di Aruba: Un tragedia horibel di un famia na Seroe Biento, sobrino a mata tanta y dos criatura

Historia di Aruba: Un tragedia horibel di un famia na Seroe Biento, sobrino a mata tanta y dos criatura

by Admin
0 comment 297 views

Durante siglo y decadanan Aruba a conoce varios tragedia, cada bario tin su historia tristo pa conta, pero hopi di nan ta manera scondi of ta taboo, cu consecuencia cu awendia hopi hende ta pensa cu Aruba semper tabata un lugar sano, perfecto y cu ta den e ultimo decadanan so Aruba a conoce kiko ta criminalidad/ tragedianan.

Alcontrario Aruba a yega di conoce varios crimen/tragedia cu a sacudi nos isla. E historia di Aruba no tabata semper color de rosa.

Naturalmente awendia nos tin e luho di internet cu nos por haya tur noticia, hopi mas liher via medionan social y websitenan.

E biaha aki nos lo dedica Historia di Aruba na un tragedia di famia hopi tristo y cruel. Esaki ta un di e tragedia cu por wordo compara un poco cu Amityville Horror cu a sosode na New York, ariba 13 di november, 1974, Ronald DeFeo Jr. a tira y mata 6 miembro di famia.
Esaki a sosode na Long Island na 112 Ocean Avenue, Amityville, New York.

Sinembargo e adres a wordo cambia pa 108 Ocean Avenue den un esfuerso pa evita turistanan bay na e localidad.


E tragedia hororoso aki a pone Hollywood traha e pelicula The Amityville Horror(1979) y tambe un buki cu e mesun nomber The Amityville Horror a True Story publica september 13 1977, pues dos aña prome.

E tragedia aki a sosode 52 aña pasa, riba un 16 di mei na Seroe Biento.

Nos lo uza nombernan fictisio pa protega identidad di e famia. Nos lo yama e tanta, Berta (33), su casa nos lo yame Juan(37) y e sobrino nos lo yame Nico(21), e ruman muher di Nico nos lo yame Lucia(15).

Diahuebs 16 di mei 1968, den oranan di mainta, Aruba a wordo sacudi pa un noticia hopi tristo, un tragedia cu a tuma lugar na Seroe Biento, henter Aruba a keda den shock. Un hoben di 21 aña a mata su tanta di 33 aña y e dos yiunan chikito di e tanta, di 5 y 1 aña.

Tur cos a cuminsa riba 15 di mei 1968, den careda di 10’or di anochi, Nico di 21 aña, su ruman muhe Lucia di 15 aña y tambe su tres ruman hombernan mas chikito, a bay pasa un anochi cerca nan tanta y omo, esaki sigur tabata un custumber.

Bertha tabata tin 33 aña, su casa Juan tabata tin 37 aña y tabata tin un bon trabou, e tabata traha na Lago. E tempo ey e trahandonan di Lago tabata tin hopi bon beneficio, cu Juan por a traha su propio cas cu hopi amor pa su señora y su dos yiunan.

E pareha tabata tin dos yiu chikito, un yiu muher di 5 aña y un yiu homber cu tabata den bay cumpli 2 aña. Un famia hoben felis den nan cas nobo. Bertha tabata hopi pega cu su sobrino Nico di 21 aña, nan tabata sali bon cu otro.

Un cos tabata sigur cu Nico tabata sufri di problema mental pisa. E aña anterior e la wordo interna den e hospital Psikiatrico na Corsou. Despues cu Nico a regresa Aruba, e la keda un tempo toch tabata basta calmo. Segun famia e diaranson ey mes den oranan di merdia, e la manera haya un ataca di nervio caba. E la bira razo, te cu a yama polis p’e, pero despues e la bolbe supuestamente calma.

Nico, Lucia y nan tres otro rumannan chikito a bay drumi, tur cos tabata  mustra trankil. Nico no por a drumi e tabata hopi nervioso, e la bay drumi prome den sala y despues a bay drumi den camber di e dos yiunan di Bertha y Juan. Den careda di 3’or di marduga den e cas tabata tin hopi desordo, un sin fin di gritamento, yoramento, cu tabata sali for di e direccion di camber di Bertha, Juan y su dos yiunan. Esaki a pone Lucia spierta, e  gritamento di angustia y sufrimento a pone Lucia pensa mesora cu tin algo horibel ta pasando y cu e mester core pa su bida.

Lucia hopi lihe a lanta para, tabata manera cu e tabata sa caba kiko ta pasando y a reaciona mesora door di core lanta su tres rumannan chikito y a sali cu nan na careda for di e cas. Den e ora laat di marduga ey, den tur e scuridad nan a core bay te na nan cas y a lanta nan tata.

E tata mesora a bisa su yiunan pa yama polis. E tata a bay di biaha na e cas di su ruman muher, mientras polis tambe tabata yegando.

Ora nan a yega na e cas nan a nota cu algo horibel mester a caba di sosode den e cas. Tur caminda tabata tin rastronan di sanger, plas di sanger tur caminda.

Nico tabata den e cas ainda y tabata hopi razo mes, e tabata manera un demonio. Ora e la mira polis, e la sali pafo cu un cuchiu di 15 cm y tambe cu un pida biga di 50 centimeter largo den su man.  E la bay riba un polis pa atak’e. E polis mesora a los un tiro banda di Nico su pia, pa e no yega mas cerca, pero e no tabata ni reaciona riba e tiro.

Na dado momento e la bin pa agredi e polis y no a keda e polis nada otro di los dos tiro, un tiro a alcansa Nico den su brasa y e otro den su pecho. Nico a keda herida pero no a fayece, ela wordo transporta pa San Pedro Hospital despues cu e la wordo trata pa e heridanan di bala, e la keda interna den un isolatie cel na San Pedro hospital. Despues e la wordo interna den Rustoord na Corsou.

Na momento cu polis a drenta den e kamber di e criaturanan, nan a bin topa cu e dos criaturanan gravemente herida. E mucha muher(5) tabata tin un hinca hopi hundo y serio den su barica. E mucha homber di casi 2 aña, tabata tin un hinca den su lomba y den su schouder.

Lamentabelmente entre e dos cambernan polis a bin topa cu Bertha den un plas di sanger benta riba vloer.

Bertha ya no tabata duna señal di bida. E la wordo hinca fatalmente den su pecho, den area di su curason  y tambe den su lomba. Den e camber di e pareha nan a bin topa Juan tira na e pia di cama, e tabata tin un hinca basta hundo y serio den su barica y tambe na su wowo, e tabata gravemente herida.

Mesora a transporta e dos criaturanan y tambe nan tata cu urgencia pa San Pedro Hospital. E yiu muher di 5 aña a fayece den careda di 5’or y mey di mainta. E yiu homber di apenas un aña y mey pa 2 aña a fayece algun ora despues. E tata a keda interna, e la wordo opera  y cu tempo a recupera.

No ta conoci si e asesino of e tata di e muchanan ainda ta na bida, pero sigur e ta algo cu a sacudi henter Aruba.

Na e cas te den oranan laat di mainta por a mira varios persona yegando, pa mira kiko a pasa. Den oranan trempan di mainta por a mira te hasta e Gezaghebber di Aruba di e tempo ey Sr. Henriquez, Hoofd officier y un cantidad di recherche a presenta na e cas. Segun algun testigo a conta nos cu for di tur bario tabata yega hende pa mira unda e tragedia a tuma lugar. Segun nan a conta nos e cas tabata tur na sanger. Un dia preto y hopi tristo den historia di Aruba.

Nico kende tabata e unico asesino a wordo interoga varios biaha. E tabata cambia constantemente su declaracion. Den su prome declaracion e la bisa recherche cu e tabata sinti su mes e anochi ey hopi nervioso. E la declara cu e tabata mira cada rato spirito y tabata scucha cosnan ta kraak den e dak di e cas.

Nico a bisa e recherchenan, cu e la bay drumi prome den e sofa, pa motibo cu e spiritonan tabata spante. Na dado momento e la cuminsa haya hopi miedo, e la pasa man pa un cuchiu y un pida biga y a bay den camber di e muchanan pa drumi. E dos armanan aki e la uza pa agredi e dos yiunan chikito di su tanta, su tanta y su omo cu tabata e unico sobreviviente.

E declaracionnan di e asesino no tabata cuadra cu otro.  Un cos cu e por a corda bon y e la declara esaki tambe, tabata ta cu despues cu e la agredi e criaturanan y nan mama y tata. Nico a coy e telefon y e mes a yama warda di polis di San Nicolas. E la bisa polis cu e la caba di hinca dos criatura y nan mama mata. Polis mesora a pidi’e e adres corecto pa nan por bati alarma y a manda un patruya. Nico no por a corda e adres y a bay den e camber di e pareha unda Juan tabata ta benta, herida. Manera nada a pasa e la puntra Juan pa e adres di e cas Juan a dun’e e adres corecto pa e por a duna polis.

Diasabra den oranan di mainta e mama y su dos yiunan a wordo hiba na nan ultimo lugar di sosiego. Tur tres a wordo dera hunto den un solo caha. Un entiero hopi tristo cu a laga Aruba den un tristeza atras.

Actualmente tin hende bibando den e cas, pero e cas a wordo cambia basta.

Fuente: Amigoe, varios persona anonimo

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio