ORANJESTAD – Den transcurso di siman pasa, Oficina di Turismo di Aruba (A.T.A.) a lansa un total di tres sector adicional cu tambe lo mester completa e Aruba Health and Happiness Code (HH Code), incluyendo e sectornan di ‘Taxi’, ‘Tour Operators’ y ‘Car Rental’. Ta urgi tur compania y/of taxista den e sectornan aki cu no a registra ainda pa haci esaki lo pronto posibel mirando cu e ultimo dia pa registra ta diabierna awor, dia 19 di juni.
A.T.A. hunto cu Departamento di Salud Publico (D.V.G.) a lansa e programa di HH Code cu e meta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba. Un cantidad grandi di compania y taxistanan den e tres sectornan di ‘Taxi’, ‘Tour Operators’ y ‘Car Rental’ ya a completa e checklist y registracion di HH Code debidamente pa asina logra pasa e prome fase di e programa. E compania y taxistanan aki awor lo wordo otorga un seyo colorido di HH Code, cual ta e seyo di pre-check. Di e forma aki, e companianan y taxistanan aki ta mustra nan dedicacion na e biniestar di nos bishitantenan como tambe nos comunidad local.
Ta haci un apelacion na tur compania den e sectornan di ‘Tour Operator’ y ‘Car Rental’ cu a completa e registracion den transcurso di siman pasa pa verifica si a ricibi un email di confirmacion, mirando cu esaki lo por a bay den ‘junk mail’. Den e sector di ‘Taxi’, tur taxista of compania cu a completa e registracion debidamente lo pronto ricibi un email di confirmacion unda lo indica e fecha riba cual por pasa busca e seyo di pre-check.
Otro sectornan cu a wordo añadi recientemente ta inclui e sectornan di ‘Spa & Salon’, ‘Watersports’ y ‘Casino’ cu tin te cu 1 di juli pa completa e registracion. Pa mas informacion tocante e HH Code y con pa registra por bishita www.arubacovid19.org/ahhc of por manda un email na [email protected]