Esmeralda – Dialuna atardi pa mas o menos 3:30 polis a bay pura un adres na Esmeralda, unda lo a sosode un incidente cu Jeep.
Loke a pasa tawata cu un dama na stuur di un Jeep Wrangler color blauw a baha pa habri un porta di cura. Aki ta unda cos a bay robes.
Posiblemente e Jeep no a wordo poni ariba brake y dado momento e vehiculo a cuminsa bin patras, direccion di e porta di cura.
Reaccion di e dama tawata di wanta e Jeep, pero dimes cu esaki no a logra.
Durante cu esaki tawata pasando, un persona cu a bin e cas pa traha ariba Solar Panel tawata pafo di e cura.
E cabayero aki a purba wanta e porta pa e Jeep no basha esaki abou.
Pero e Jeep tin mas peso y a basha e porta e abou, causando cu e cabayero cu kier a yuda a resulta herida na su cabes. E lo a ricibi un kap serio na su cabes, mientras e dama tambe a ricibi algun sla.
Na yegada di Ambulance e Paramediconan mesora a bay atende cu ambos persona, cu a resulta herida momento cu e Jeep su so a cuminsa move bay patras.
Polis di trafico tambe a presenta na e adres.
