Accidente serio na Hooiberg a laga dos persona herida atras

Hooiberg/Sero Biento – Diabierna anochi laat caminda di Hooiberg pa Santa Cruz a tranca, esaki tawata debi na un accidente di trafico frontal.

Na yegada di polis nan a topa cu un Nissan Cube shinishi y un Kia Picanto cora. E Nissan Cube tawata pega contra cura di un cas y e Kia pega contra e Nissan Cube.

Pafo di e Nissan e chauffeur tawata ariba su barica kehando di hopi dolor. Banda pabou tawata chauffeur di e Kia Picanto cu ta un dama, e tambe a resulta herida pero no di gravedad.

Dos ambulance a presenta na e sitio y Paramediconan a opta pa hiba ambos persona uno mas herida cu e otro pa Hospital.

Departamento di trafico lo tin e tarea di investiga kiko a exactamente a sosode.