Caracas, Venezuela – E pais Latino ya tin algun añas den un crisis severo, afectando tur area di bida pa e pueblo Venezolano. E situacion no ta mustra di lo cambia pronto. Awor cu e crisis global di COVID-19, tin hasta mas indicacion cu e situacion di e pais lo empeora.
Famianan a haya nan ta traha ‘hut’ parecido na locual antes tawata wordo construi na Aruba,pues ‘cas di torto’. Hendenan den necesidad y cu no tin e manera pa paga huur mas a haya nan ta traha cas uzando lodo y bamboo. E casnan aki no tin conexion di coriente, awa o un sistema di riolering.
E bista di e hogarnan aki a bira un simbolo di e continuo crecemento di pobresa extremo den e pais. 16 famia den e comunidad cu yama ‘Los Trailers’ ya a logra lanta nan cas, mientras un 14 famia ainda ta den construccion. E miembronan di e comunidad aki a duna di conoce cu bloki ta mucho caro.
E famianan aki ta cumpra awa for di un put den e bario. Como cu no tin toilet, hendenan ta haci nan necesidadnan den saco di plastic cual despues ta wordo tira den yerbe.
Tambe hopi ta cushina uzando stove cu nan mes a logra construi.
Nacionan Uni ta bisa cu Venezuela na aña 2019 tawata e pais den di 4 lugar pa locual ta crisis pa falta di alimentacion. Un poco mas cu 9 miyon persona bibando na Venezuela tawata sufri di hamber y falta di nutricion.
Algun miembro di e comunidad a splica cu nan no por a afford e 10$ di huur cu nan tawata tin di paga mensual. Como cu nan no por a uza bloki, nan a uza lodo y bamboo pa traha nan hogar.
Un di e miembro di e comunidad di ‘Los Trailers’ cu a lanta su cas traha di lodo ta Luis Hernandez (30 aña). E a logra planta tambe algun fruta y berdura patras di su cas pa e por come. E ta splica cu e situacion ta tristo y ta bisa “pero kico nos por haci? Nos mester sigui…”