Den nos articulo anterior PHP a informa con pa haya e nacionalidad Hulandes segun ley. Den e edicion aki PHP lo elabora specificamente riba e basenan pa haya nacionalidad Hulandes menciona den art. 4 y art. 5 di Rijkswet op het Nederlanderschap. Nos lo uza e letternan RWN den e articulo aki pa sigui referi na e ley corespondiente. Ta bon pa remarca cu e ley cu ta reglamenta nacionalidad Hulandes ta un Rijkswet (ley di Reino) y cu nacionalidad Hulands ta un asunto di Reino Hulandes.
No obstante locual ta ser describi den art. 3 RWN den articulonan 4 & 5 tin mas base pa haya e nacionalidad Hulandes ta wordo describi. Art. 4 inciso uno RWN ta menciona cu Hulandes tambe ta e yiu di un persona unda cu e paternidad legal a wordo estableci. E base aki tin e siguiente exigencianan. E promer ta, cu e yiu mester ta menor di edad na momento cu e sentencia di paternidad a ser determina den nos corte di prome instancia. E di dos exigencia ta, cu naturalmente e mayor tin e nacionalidad Hulandes of, den caso cu e mayor a fayece, cu na momento di e fayecimento e tabata tin e nacionalidad Hulandes.
E segundo inciso di e articulo aki ta menciona cu e mucha stranhero menor di edad cu wordo reconoci door di un Hulandes despues di su fecha di nacimento y prome cu e cumpli e edad di shete aña, tambe ta haya e nacionalidad Hulandes. E tercer base menciona den art. 4 RWN cual un mucha stranhero menor di edad por haya e nacionalidad Hulandes (si acaso e no a wordo reconoci), ta si pa medio di ley (p.e. door di matrimonio) el a bira e yiu di un Hulandes. Un di cuater punto ta e mucha stranhero menor di edad cu a wordo reconoci despues di su nacimento door di un Hulandes cu por demostra su paternidad biologico den e periodo di 1 aña despues cu el a reconoce e mucha. Den caso cu e mayor por demostra cu e ta e mayor biologico di e mucha, e yiu tambe lo haya e nacionalidad Hulandes.
Adopcion tambe por bisa un base pa haya e nacionalidad Hulandes. Esaki ta wordo menciona den art. 5 RWN. E articulo aki ta menciona cu e mucha cu wordo adopta na Hulanda, Aruba, Curaçao of Sint Maarten tambe ta haya e nacionalidad Hulandes, den caso cu e mucha ta menor di edad na momento cu e sentencia di adopcion a ser duna den corte di prome instancia y tambe cu por lo menos un di e mayornan adoptivo ta Hulandes.
E ley di reino regarda nacionalidad Hulandes conoce mas base cual un mucha por haya nacionalidad Hulandes. Den un otro edicion lo elabora riba esakinan pero tambe e alternativanan pa haya nacionalidad Hulandes pa medio di opcion of naturalisacion. Tienda di Ley kier enfatisa cu a trata mas tanto posibel na splica e articulonan aki den Papiamento pero no tur biaha tin palabranan huridico exacto cu por wordo usa. Ta spera cu por a informa e lector na un form satisfactorio tocante e topico aki.
Autornan:
Gerick Croes LL.B. & B.ec
Minorca Martis LL.B.pa remarca