Companianan cu tin fondo por paga 100% di salario di empleado
Oranjestad – Durante un conferencia di prensa Minister Xiomara Maduro a duna un update di e Subsidio di Salario y a splica tocante e flexibilisacion di Subsidio di Salario.
Cantidad di Subsidio di Salario otorga na luna di mei 2020
E mandatario ta informa cu tin un cantidad di 3.232 negoshi vulnerabel na Aruba cu a wordo afecta pa e crisis di COVD19. SVb a ricibi un cantidad di 1.656 peticion, di cual 1.648 compania a ricibi Subsidio di Salario. SVb falta di paga 8 compania ainda, di cual 4 compania nan cuenta di banco no ta conoci y 4 compania nan pago a ser rechasa. Un total di 26.802 trahado a ricibi un Subsidio di Salario na luna di mei cu ta suma un montante total di Afl. 46.399.106,=
Flexibilisacion Subsidio di Salario
Na inicio di e programa di Subsidio di Salario, e mandatario a anuncia cu Gobierno di Aruba ta otorga un maximo di 60% di e gasto di salario y e trahado ta entrega 20% di reduccion di oranan di trabou. Den e parti di reduccion di orario di trabou (‘arbeidstijdverkorting’) cu ta un condicion di CAFT tabatin varios interpretacion. Den un reunion tripartite cu gremionan comercial, sindicato y departamentonan di Gobierno a yega conhuntamente na un acuerdo pa flexibilisa e condicion riba reduccion di orarionan di trabou. E acuerdo aki ta encera cu e dunado di trabou y e trahado mester yega na un acuerdo mutuo por escrito con ta cubri e resto di e 40% di salario. Esaki ta nifica tambe si un compania tin e fondonan necesario pa por cubri e resto di e 40%, e compania por paga 100% di salario di e trahado.
4 categoria di Flexibilisacion
Desde 3 di juni 2020 tur compania cu ta bin na remarca pa un Subsidio di Salario di Gobierno di Aruba pa luna di juni 2020 a ricibi un notificacion di SVb via email. SVb a dividi e dunado di trabou den 4 categoria di flexibilisacion:
Categoria 1:
E dunado di trabou cu a entrega e peticion pa Subsidio di Salario caba cu e formulario di reduccion di 20% y no ta desea flexibilisacion. E compania aki no mester tuma ningun accion y mester warda riba e evaluacion di su peticion.
Categoria 2:
E dunado di trabou cu a entrega su peticion y su formulario di reduccion di trabou di 20% y cu si ta desea flexibilisacion. E compania aki mester manda un email na [email protected] y solicita un lista nobo y debolbe esaki yena y firma pa trahadonan cu ta acepta e condicion y email esaki na [email protected]
Categoria 3:
E dunado di trabou cu no a entrega un peticion ainda y cu no ta desea flexibilisacion; ta sigui e procedura riba MiSVb.
Categoria 4:
E dunado di trabou cu no a entrega un peticion ainda y cu si ta desea flexibilisacion, tin cu manda un email na [email protected] y solicita un lista nobo pa yena. E dunado di trabou mester yena y firma e lista y upload esaki riba MiSVb pa completa cu aplicacion.
Deadline pa entrega peticion a bira 19 di juni 2020
E fecha pa entrega e peticion pa Subsidio di Salario ta bira diabierna 19 di juni pa 12or di anochi. E mandatario ta informa cu CAFt a manda su recomendacion pa Conseho di Minister di Reino Hulandes cu Aruba ta cumpli cu e condicionnan necesario pa e Subsidio di Salario. Esey ta haci posibel cu pa diamars Aruba lo ricibi e fondonan di Subsidio di Salario. E pagonan di Subsidio di Salario lo ser efectua entre 26 y 29 di juni 2020.
Gradicimento
E mandatario ta gradici SVb cu ta trahando riba implementacion di e Subsidio di Salario y ta yama un danki tambe na e Taskforce cu ta trahando riba e programa di Subsidio di Salario.
