Home Entertainment MetaCorp ta sigui inverti den nos economia Drive-In lo habri otro...

MetaCorp ta sigui inverti den nos economia Drive-In lo habri otro luna caba

SHARE

 

 

ORANJESTAD, Aruba – Trabounan di construccion ta avansando lihe na E. de Veer Drive-In Theater, pa por habri bek den algun siman di tempo. E meta ta pa purba crea e mesun ambiente te unda ta posibel, cu e mesun edificio di consecion y cu e mesun menu. Na e momento aki tin cinco contratista chikito envolvi den e trabounan di renobacion y construccion di e edificio. Director di MetaCorp, Eddie de Veer, a sigura cu compania a haci un inversion cuantioso pa por adkiri ekiponan nobo y moderno pa proyecta pelicula riba pantaya grandi.

 

“Si bo sigui social media, ta nota cu a lanta e memorianan for di soño atrobe. Hopi ta recorda nan hubentud. Tin un acogida grandi di esunnan cu a bay Drive-In den añanan 70, 80 y parcialmente 90 y lo ta interesante pa wak con nan yiunan lo reacciona cu un Drive-In, unda ta mira pelicula den auto, den un ambiente familiar y alabes social”, asina Eddie de Veer a conta.

 

E concepto riba mesa awor, ta pa purba mantene e mesun estilo di antes. Lo haci uzo di un canal di radio riba FM pa transmiti zonido di e peliculanan. Asina por ehempel a conserva e mashin cu ta conta cuanto cliente ta drenta den e area di consecion. Pa loke ta e menu, esey tambe lo purba iguala. Lamentablemente e famoso hamburger, e sabor probablemente lo no ta mesun cos, pasoba e persona cu tabata trah’e no ta na bida mas. “Pero asina mes lo haci tur intento pa yega na e mesun smaak original”, di acuerdo cu Eddie de Veer.

 

  1. De Veer Drive-In Theater a habri na Kibaima na aña 1969 cu e prome pelicula “The guns of Navarone”. Nan a cera na aña 2009 y e utimo pelicula tabata “Fast and the Furious # 4”. E Drive-In tin espacio pa staciona 380 auto.

 

Ainda no ta sigur cu cua pelicula lo habri atrobe. “Nos ta cerando acuerdonan. Pero Covid-19 a causa cu disponibilidad di cierto peliculanan a move pa otro temporadanan di aña….pero nos lo tin algo bon. Nos lo bin cu un pelicula cu ta pas bon cu tur locual nos ta haciendo aki”, asina Eddie de Veer a sigura.

 

Algun siman pasa a anuncia cu Drive-In lo habri den 6 siman y esey ta encera den e prome of di dos siman di luna di Juli. Eddie de Veer a bisa cu e concepto nobo lo encera cu ta cobra pa auto en bes di cobra pa persona. E intencion ta pa habri tur dia, cu diferente orario di peliculanan.