Pa medio di e comunicado aki nos ta anuncia y alabes informa un y tur cu ta desea di contribui na e Master Plan pa Aruba su recuperacion y futuro, cu lo organisa dos (2) ‘Town Hall’ den un forma digital pa por brinda mas informacion di e proceso, e resultado preliminar y colecta comentario (feedback) y pregunta na un forma habri y transparente. Por registra pa tur dos Town Hall via e pagina di Facebook di Gabinete Wever-Croes.
Virtual Town Halls:
Prome Town Hall
Topico: Reforma Publico
Fecha: 9 di juni 2020, 8:00 PM
Segundo Town Hall
Topico: Modelo Economico Nobo
Fecha: 10 di juni 2020, 8:00 PM
Town Hall 1: Reforma Publico
E prome Town Hall lo tuma lugar dia 9 di juni pa 8 or di anochi y lo introduci e plan y ideanan pa reforma den e sector publico y innova e aparato gubernamental pa hacie uno mas agil y brinda un miho servicio na e ciudadano. Na mes momento lo duna oportunidad na e generacion nobo den sector publico pa comparti nan experiencianan y ideanan pa transforma nos sector publico den uno mas innovativo y eficiente pa por logra nos metanan como pais, entre otro diversificacion di nos economia, salud publico, seguridad di cuminda (food security) y adaptacion pa cambio di clima (climate change).
Town Hall 2: New Economic Model: Repositioning our Sails
E di dos Town Hall lo tuma lugar dia 10 di juni pa 8 or di anochi y lo introduci e plan y recomendacionnan pa un modelo economico pa Aruba. Cu e focus riba diversificacion di nos economia y un modelo mas sostenibel y circular. Durante e Town Hall, ademas di e lidernan di diferente Task Forces, lo tin varios expertonan y young entrepreneurs cu lo duna nan recomendacionnan y lo tin oportunidad pa e comunidad tambe participa.
Gobierno di Aruba a cuminsa cu un iniciativa coordina na nivel nacional pa desaroya un plan di accion pa recuperacion economico y innovacion. E plan aki tin como meta crecemento economico den un forma innovativo, inclusivo, y sostenibel, incluyendo e condicionnan necesario pa un economia resiliente den termino largo, mientras den e trayecto aki lo tin cu cuminsa mira beneficionan den termino corto y medio. Esaki cu un sosten nacional mas amplio posibel.
Den cuadro di esaki, Conseho di Minister a institui e ‘Recovery and Innovation Committee’ manera cu Prome Minister a anuncia den luna di April. E comision aki tin como tarea pa desaroya:
e vision di un economia transforma;
reformanan structural como condicion pa: recuperacion, stabilidad, y crecemento economico sostenibel;
identifica sectornan strategico (nobo) cu ta trece un balor agrega na nos economia;
un maneho pa guia decisionnan riba inversionnan grandi den sector priva y publico.
E comision di ‘Recovery and Innovation’ ta un plataforma ‘public-private’ unico, cu den su totalidad, na tur nivel, ta consisti di representantenan di sectornan: Priva, Publico, Academico, y Civico. Mas cu 175 ciudadano ta participando den esaki (riba titulo personal), a base di nan background profesional. Mayoria no ta representa nan respectivo organisacionnan den esaki.
E tareanan di e comision ‘Recovery and Innovation’ ta dividi den tres (3) sub-comision, ‘Stabilization & Stimulus’, ‘Fast-Track & Reactivation’ y ‘Innovation & Resilience’. Den termino corto, conseho y decisionnan proponi pa ‘Stabilization & Stimulus’ a wordo entrega na Gobierno, y mayoria ta den pleno ehecucion. Den e forma aki ta duna un ‘boost’ sumamente necesario pa reactiva nos economia cu sosten financiero, humanitario y medico, cu ayudo di Hulanda, pa asina alivia e consecuencianan. E trabounan di ‘Fast-Track & Reactivation’ ta andando y pronto lo entrega nan conseho na Gobierno tocante proyectonan di inversion cu posiblemente lo por pasa den un trayecto mas acelera si nan cumpli cu cierto rekisitonan pa yuda re-activa nos economia.
Mas informacion tocante e Virtual Town Halls y registracion bishita e Facebook pagina di Gabinete Wever-Croes.
Gobierno di Aruba kier a gradici tur participante pa nan contribucion di un forma of otro na e proceso aki. Nos ta aprecia y ta balora boso tempo, esfuerso, aportacion y ta sumamente agradecido pa boso dedicacion den e momentonan aki unda cu como pais nos ta enfrentando retonan nunca bisto. Un danki di curason!