Prome Minister Evelyn Wever-Croes, durante e conferencia di prensa di Gobierno di Aruba pa duna informacionnan tocante e maneho di Covid-19, a elabora riba e problematica di nos residentenan y yuinan di residente pega den exterior. Na e momentonan aki nos tin mas di 300 residente pega den exterior na diferente parti di mundo. Mayoria di e paisnan na unda nan ta pega ta pasobra e paisnan ey tin nan fronteranan cera. Otronan no por bolbe bek pasobra no tin vuelo pasobra e aerolineanan a dicidi di stop di bula.
Prome Minister a enfatisa cu Gobierno ta purbando mas tanto cu ta posibel pa regla vuelonan humanitario pasobra tin paisnan cu ta permiti excepcion pa vuelonan humanitario. Esaki, Prome Minister a duna di conoce, no ta facil. Ta hopi complica si nos tin residentenan pega na Merca of studiantenan cu ta studia na Merca y pa motibo diferente nan no por keda Merca awor cu scol a cera. Nan por bin ora cu tin un vuelo y mayoria di biaha tin un vuelo ora cu ta autoridad mericano tin cu busca hende akinan of trece hendenan for di merca pa CBP. Dus ora cu nan saca un vuelo, Gobierno ta yega na palabracion y percura pa nos residentenan of studiantenan ta riba e vuelo ey.
Cu Hulanda esaki ta mesun cos. Ora cu KLM dicidi di saca un vuelo, Gobierno ta yega na palabracion cu nan y esnan cu ta registra e ora ta haña oportunidad pa bin riba e vuelo ey. Awor cu Hulanda tin algun palabracion haci pasobra nos mester di e vuelonan aki pa yega Aruba por lo menos 1 biaha pa siman pa trece remedi. E ora a yega na palabracionnan cu entrante 7 di juni cu tur fin di siman nan ta bay manda un avion Aruba pa garantisa nos remedinan. Pues nos residentenan na Hulanda tin mas oportunidad e ora pa bin pasobra nos sa cu por lo menos pa e luna aki tin 1 vuelo pa siman ta bin Aruba.
Na Venezuela nos tin un cantidad di 39 hende pega. Venezuela tin nan fronteranan cera. Gobierno a purba na mas di un ocacion, a inverti placa y no a logra trece nos hendenan ainda. Cada biaha ta parce cu ta yegando e punto cu nan ta permiti un vuelo humanitario, Venezuela ta cancel’e of stop e na ultimo momento. Esey ta e realidad cu nos ta bibando aden, pero nos lo sigui purba.
Gobierno a trece un vuelo di Colombia dos siman pasa. Ainda tin mas hende na Colombia cu mester bin pues tur esey tambe Gobierno ta preparando. Tambe tin hende pega na Ecuador.
Tur residente cu a logra bin bek Aruba, mester mantene nan mes na reglanan di cuarentena pa 14 dia.
“No ta facil, Gobierno di Aruba no tin un avion pa manda busca hende y no tin e placa pa manda diferente charter pa busca hende rond di mundo. Pero nos ta purbando y haciendo nos maximo esfuerso”, Prome Minister a enfatisa.
Ta importante si pa tur esnan pega den exterior registra na [email protected] pa asina Gobierno tin un idea cuanto hende kier of mester bin bek. Pues ta hopi importante pa registra y bisa na unda bo ta pa bo ta den e registro. Ora cu Gobierno tin un bista di cuanto hende tin na un luga, lo por purba pa organisa e vuelo. “Nos no por garantisa nada pero nos lo haci nos maximo esfuerso”, Prome Minister a duna di conoce.