Home Lifestyle Kende ta mas na risico pa motibo di covid-19 Departamento di Salud...

Kende ta mas na risico pa motibo di covid-19 Departamento di Salud Publico ta specifica e grupo di riesgo.

SHARE

 

ORANJESTAD, Aruba – Den luna di december di aña 2019, mundo henter a wordo informa di un virus nobo cu tawata transmitiendo su mes rapidamente di hende pa hende y tawata causando bastante morto. Como cu e virus tawata uno no conoci (nobo) pa scientificonan, a compara esaki cu otro virusnan parecido mientras cu a bay ta studia e caracteristicana y comportacion di e propio virus. Esaki ta e motibo pakico cierto informacionan cu a sali na comienso di e pandemia di Covid-19 cu tempo a conose cambio.

Un di e cambionan ta e definicion di e grupo di risico. Na comienso esnan cu a wordo categorisa como grupo di risico tawata hopi amplio. Cu transcurso di e dianan y e diferente informacionan colecta e grupo di risico por a wordo ahusta y mihor specifica. Esnan cu ta na risico pa desaroya complicacion pa motibo di covid-19 ta como lo siguiente;

• Adulto mayor riba 70 aña
• Adulto riba 18 aña cu e siguiente condicionnan di salud.
 Bou tratamento medico di specialista di pulmon, debi na gravedad di su malesa cronico no regula y desfunccion di su pulmon y vianan respiratorio.
 Tin un malesa cronico di curazon cu debi na e gravedad ta bou tratamento medico di cardioloog.
 Diabetes mal regula, no regula of diabetes cu complicacionan secundario.
 Problema di rion grave cu ta dialisando of ta wardando pa transplante di rion.
• Un sistema inmunologico abou debi na
 medicamento pa malesa auto-inmune
 despues di un transplante di organo of stamcell,
 un malesa hematologico, asplenia of otro malesanan cu ta afecta e sistema inmunologico cu ta rekeri tratamento medico debi na e gravedad di e malesa manera HIV no trata of HIV cu valor di CD-4 <200 mm³
 serca pashent di cancer cu ta hayando of den e ultimo 3 lunanan a haya chemotherapie y/of bestraling.
• Malesa grave di higra (Child-Pugh classificatie B of C)
• Obesidad (sobrepeso extremo) cu un BMI di 40 of mas