Tanki Leendert: Dialuna den oranan di mainta varios patruya di polis di Oranjestad y Noord y tambe Brandweer a wordo manda cu hopi urgencia na e Misa di Tanki Leendert, pa un persona cu lo ta canando sunu riba e dak di e misa.
E homber prome cu ela subi riba e dak, dilanti di e misa el a kita full su paña y a bisa pa niun hende subi riba e dak, si no e lo bula abou. E tabata na e parti di e dak dilanti cu ta e parti mas halto.
Na yegada nan a bin topa cu e mama di e homber pariba di e misa, e mama tabata na rudia ta resa y sclama pidiendo Dios pa su yiu homber no bula for di e dak di misa. Polis a papia cu e mama y e mama a splica polis, cu ta varios biaha caba su yiu homber ta usa algun droga y ta bira asina.
Na momento cu Brandweer a pone trapi y como 5 polis a subi riba e dak, e homber a bula for di e dak pero na e banda pariba di e dak, caminda e dak ta mas abou. Manera cu e homber a bula for di e dak algun polis a acerk’e, mesora nan a ripara cu e no ta herida, nan a boei’e y a tapa su curpa cu un paña berde. Polis a lag’e drumi riba vloer te ora cu transportwagen a yega, e la wordo hiba na warda di playa.
