Na prinsipio di e aña aki, na mart, polis i Ministerio Públiko a anunsiá ku nan lo bolbe habri un asina yamá ‘cold case’. Nan a hasi un petishon di yudansa na pueblo di Kòrsou i a ofresé un rekompensa di Naf. 10.000,- pa e tep òf tepnan di oro ku lo hiba na e solushon di e kaso. Desafortunadamente, te ku fecha di awe, e yamada aki no a duna muchu resultado. Ta posibel ku e notisia aki a bai perdí den e notisianan relashoná ku Corona. Polis i Ministerio Públiko ta pidi pueblo urgentemente pa kompartí informashon ku nan tin tokante di e kaso. E rekompensa di 10.000 florin pa e tep òf tepnan di oro ta keda konta.
E kaso en kuestion ta referí na e morto di un mucha muhé di 19 aña yamá Rayziënne (Raiza) Scoop. Den e marduga di 31 di desèmber 2011 pa 1 di yanüari 2012, el a sali kas di su frèi i tabata pèrdí pa un tempu largu. Riba 19 di mart 2012 a haña su kurpa sin bida den mondi di Playa Canoa. Pa medio di investigashon di DNA na enkargo di NFI na Hulanda finalmente a determiná ku e kurpa tabata trata e damita di 19 aña Raiza Scoop. E tempu ei, na 2012, despues di investigashon, polis a hasi vários detenshon i skucha testigunan. Sinembargo, na dado momento e investigashon di polis a stanka i no tabata tin sufisiente pa por hiba un persona Korte. A bolbe habri e kaso bèk mirando e gravedat di e kaso, e edat hóben di e víktima i e presuntu forma kruel ku a asesiná e damita.
E petishon na personanan ku tin informashon tokante e desaparishon i/òf morto di Raiza Scoop, kaminda kalke detaye ta bonbiní, por tuma kontakto mas pronto posibel ku polis riba e number di telefòn: 108. Lo trata tur tèp risibí via di e number di telefòn aki di forma anónimo i konfidensial.