Santo di Patia – Tension halto den nos Korrectie Instituut Aruba (KIA) debi na cambionan di cantidad di bishitantenan y cambionan cu lo presenta ora frontera habri bek.
Durante un reunion recientemente cu e Directeur, Onder Directeur y Comision di Preso (GEDECO) a bin varios punto dilanti, y esakinan por bisa lo tin di haber cu e “normal nobo”.
Manera cu varios biaha mandatarionan a enfatisa, loke tawata normal lo no bay existi mas, pues den KIA tambe lo bay mira cambionan. Pero, ora cu esaki a yega na conocimento di e presonan, esaki no a cay nada bon, y principalmente pa motibo cu nan tin hopi tempo sin wak nan famianan.
E problemanan lo cuminsa momento cu frontera habri bek. Loke a indigna y/of a haci e presonan furioso ta mastanto tocante e cantidad di bishitantenan cu lo por presenta na KIA.
Segun a wordo treci dilanti, cambionan lo encera ora di ricibi bishita, solamente dos adulto of un adulto y dos mucha mag ta presente. Pues e limitacion aki ta inaceptabel pa e presonan.
O sea si e preso tin 3 yiu, solamente 2 por drenta hunto cu 1 adulto. Si mas persona kier bishita e preso, esaki lo no ta posibel mas. Den KIA tin algun preso cu ta haya hopi bishitante, pero manera cos ta pintando esaki lo wordo elimina.
Tambe loke KIA lo bay haci ta unabes frontera habri e instituto lo lock down. Asina limitando e contacto fisico cu sea famia/amistad por completo. Dia di bishita e preso lo wordo treci abou y su unico contacto lo bira via video chat (p.e. Skype).
Esaki tin presonan masha hostina mes. Comprendibel ta e hecho cu presonan lo ta haya hopi falta di nan famia. Sosten di famia y amistad ta importante pa e salud mental y rehabilitacion di preso.
E presonan ta basta disgusta y ta duna di conoce cu si no bin cu un otro alternativa cu nan lo por “biba” cune, lo por spera actonan di protesta den e instituto. Ya caba a wordo papia cu KIA lo keda ‘preto preto’, bayendo den direccion cu candela lo wordo cendi den e compleho, locual a yega di pasa caba.
Aki por mira cu ta menasanan hopi serio dirigi na e directeur y su personal.