Home Local Negligencia di mucha. Abo sa kico esaki ta?

Negligencia di mucha. Abo sa kico esaki ta?

SHARE

 

Oranjestad, Aruba – Nos ta papia di negligencia di mucha, ora e mayornan of e cuidado di un mucha, continuamente ta faya pa provee e necesidadnan basico fisicamente y psicologicamente cu un mucha tin mester cu por resulta den un descapacidad di e mucha su salud y desaroyo. E efectonan di negligencia di mucha ta pa bida largo y por causa sentimentonan profundo di soledad, isolacion y un autoestima hopi abou. 

 

Pero ki ora nos ta papia di negligencia di mucha?

  • Ora cu no ta duna un mucha cuminda, paña of cuido di salud cu e tin mester; 
  • Ora ta cera un mucha den un camber of un “closet” cu e no por sali;
  • Ora cu no ta duna un mucha e proteccion di un cas, ta bandona un mucha of ta saca un mucha for di cas;
  • Ora ta expone un mucha den un situacion peligroso caminda e por experiencia daño emocional of fisico;
  • Ora ta laga un mucha pa un periodo hopi largo su so na cas of un luga desconoci;
  • Ora un adulto ta neglisha of no ta atende cu e necesidadnan emocional of fisico di un mucha, ta papia di negligencia di mucha, cu ta un forma di abuso di mucha; 

Con pa señala negligencia di mucha?

Si un mayor of cuidado di mucha ta comete actonan di negligencia di mucha, por reconoce esaki na entre otro e siguiente señalnan:

  • E mucha tin necesidad di cuido medico of dental cu no ta wordo atendi;
  • E mucha ta cana rond continuamente cu paña sushi, cabey sin laba of ta cana rond sin baña;
  • E mucha ta haci uzo di alcohol of droga;
  • E mucha ta bisti e mesun pañanan tur ora y semper ta bisti inapropia tur caminda; 
  • E mucha ta falta su scol frecuentemente; 
  • E mucha tin mester di un “bril” pero nunca e tin esaki;
  • E mucha ta bisa of ta expresa cu e ta su so na cas y cu no tin niun hende pa wak pe na cas; 

 

E señalnan aki hopi biaha ta acumula durante un periodo prome cu constata cu tin un caso di negligencia ta tumando luga. Pa es motibo semper mester keda alerto como adulto y no keda keto pa busca ayudo of conseho di nos profesionalnan. Paso cu e accion corecto bo por yuda y te hasta salba un bida.

E ta tuma un comunidad pa lanta un mucha, pesey Comision Vision Pedagogico ta brinda e guia, sosten y educacion na mayornan y cuidadonan di mucha pa asina asisti den un forma preventivo den e lantamento di mucha y pa asina preveni tambe abuso di mucha. 

Kico abo por haci pa yuda un mucha? 

Silencio ta permiti cu violencia ta sigui sosode. Si bo ta sinti of tin sospecho cu algo no ta corecto of bo ta mira of scucha algo sospechoso, por fabor no keda den silencio y acudi na un instancia pa ayudo.

 

  • Yama Bureau Sostenemi na 5881010 si bo mester di conseho, tin sospecho y of kier raporta un caso di abuso di mucha;
  • Yama Fundacion Respeta Mi na 5824433 pa informacion, conseho y guia tocante caso di abuso di menor;
  • Yama Tienda di Educacion na 161 pa guia tocante lantamento di mucha y hoben;
  • Yama seccion Bida y Famia di Departamento di Asunto Social na 5281150 pa guia psicologico y ortopedagogico pa famia y pareha.

 

Den un caso di emergencia cu bo ta sinti cu e bida di un mucha ta na peliger yama Polis na 100! Un yamada por scapa un bida cu trauma. Un yamada por salba un bida. 

 

E ta hopi importante pa nos como comunidad ta consciente y bon informa di e señalnan di abuso di mucha pa asina nos por actua debidamente. Bishita nos website www.scparuba.com y click ariba nos pagina “Reconoce abuso di mucha” y keda bon informa. Bo iniciativa por salba un bida di un mucha, paso e bienestar y siguridad di nos muchanan ta e responsabilidad di nos tur.