105
A tuma nota cu Parlamentario sr. Robert Candelaria a bolbe cay den su jaloezie di e hecho cu desde 2019 Cuerpo Policial di Aruba tin un helicopter atrobe na su disposicion. Pa cuminsa e disponibilidad di un helicopter pa KPA a mustra su balor agrega desde 2007 te cu 2013 y di 2019 te cu awe, y mirando e retonan sin precedente cu nos Pais ta pasando awor aki debi na COVID-19 e helicopter ta mas necesario cu nunca pa asisti den mantencion di orden publico y vigila nos frontera.
E hecho cu su colega di partido como minister di Husticia anterior a prolonga e helicopter anterior di KPA te cu fin di aña 2013, y ademas na aña 2014 a purba haya un helicopter nobo pa KPA (pero e mester a para e proceso debi na un caso den Corte), ta prueba cu gobierno anterior di AVP tambe a wak e balor agrega di un helicopter pa KPA.
Ademas Sr. Candelaria ta lubida cu a. huridicamente bo no por djies traspasa un contract pa Kustwacht, b. e helicopternan di Kustwacht ta tarda minimo 45 minuut te un 1 ora pa por yega Aruba, c. nan no ta zomaar inzetbaar riba tera (articulo 3 di e Rijkswet) y d. e helicopternan ey meste ta stand by pa e tarea adicional di Kustwacht cu ta Search & Rescue (articulo 2 di e Rijkswet). Pues al contrario na e sugerencia di sr. Candelaria e helicopternan di Kustwacht no ta un alternativa.
E fondonan cu ta haya di Hulanda den cuadro di COVID-19 ta prestamo, Aruba ta cumpliendo cu e rekisitonan di Hulanda pa cu e prestamonan.
Aruba ta un pais autonomo den Reino y ta determina su propio maneho pa cu entre otro orden y seguridad di nos isla.
Si Sr. Candelaria di berdad kier evalua con pa baha gasto, dicon e no ta pensa riba sugerencianan con pa alivia e peso financiero di e proyectonan PPP cu gobierno di AVP a compromete futuro generacionan cune, cual ta costa Pais Aruba den careda di 80 miyon Florin pa aña?