Home » Asociacion Arubiano di Prensa wardando reunion cu Altocomisario  Acuerdo nobo cu Polis ta essencial pa Prensa por haci su trabao

Asociacion Arubiano di Prensa wardando reunion cu Altocomisario  Acuerdo nobo cu Polis ta essencial pa Prensa por haci su trabao

by Admin
0 comment 61 views

 

Ta algun siman caba, desde cu e pandemia a inicia, cu a solicita un reunion urgente cu Mando Policial, pa por determina con e dos entidadnan aki, esta Prensa y Polis, por traha banda di otro riba caya sin cu esun ta stroba e otro y cada un respetando e autoridad y e responsabilidad di e otro. Mescos cu Polis a yega na acuerdo cu companianan priva pa atende accidentenan di auto, asina Polis ainda no tin un acuerdo formal cu prensa riba forma di traha ora di cubri un noticia di suceso. E diferencia ta cu e rol di prensa den comunidad ta ancra den nos constitucion, esta libertad di expresion. Tur pais cu ta respeta nan mes, ta promove un estado di derecho cu prensa liber.

A funda Asociacion Arubiano di Prensa

Un grupo di miembronan di prensa cu a sinti falta di un asociacion asina durante e pandemia a sirbi como e fundadonan, mientras cu awor tin un comision cu ta reclutando miembronan nobo. Na mes momento, ta reglando afiliacion internacional, tanto cu e continente Americano, cu Hulanda y via Hulanda mes cu e organisacion mundial di prensa.

Meta ta pa entre otro yega na e mesun protocol manera tin entre e periodistanan na Hulanda cu e Cuerpo di Polis Hulandes, den cual via un protocol entre e asociacion di prensa di Hulanda y KLPD, ta otorga un carnet di prensa cu ta duna aceso na sitionan di incidente. Den esaki mester pensa riba accidentenan, candela, demostracionnan riba caya y hasta na momento di calamidad. E carchi tin balor na momento cu Polis cera caminda pa publico, cu ta duna e miembro di prensa cierto acceso pa por eherce su trabou di informa comunidad.

Acuerdo existente KPA-Prensa

Den pasado, apenas na inicio di añanan 90, a yega di cera un protocol preliminar cu Altocomisario Alwin Nectar e tempo aya. Por corda cu Comisario Jan van der Straten a hunga un rol escencial den e acuerdo aki y hasta a hiba miembronan di prensa local te Hulanda pa mira con Polisnan ta funciona eynan. Pero cu tempo, Polisnan hoben di e generacion nobo no conoce e protocol aki y ta aplica nan mesun “reglanan” durante incidentenan riba caminda publico.

Asina por ehempel Polis a detene un periodista eherciendo su trabou durante pleno Toque de Queda. Ministerio Publico a elimina e multa y a disculpa pa esaki. Ta considera Prensa como un trabou escencial durante un calamidad den henter Reino Hulandes.

Pa evita mas di e tipo di “erornan” asina den cual ta obstaculisa e rol di eherce nos funcion den forma liber, ta bogando pa reuni cu Altocomisario di Polis pa yega na acuerdonan nobo, moderno y eficiente pa tanto e Cuerpo di Polis y e organisacion di prensa en general. Ta sinti cu awor mas cu nunca un acuerdo asina lo yuda pa promove un comunidad miho informa, specialmente memey di un pandemia y e proceso di recuperacion cu ta sigui su tras. Cu tanto avancenan moderno, sin lubida e rol cu rednan social ta hunga awendia, cu e rol di Prensa ta mas escencial ainda. Publico mester por conta cu un fuente di informacion confiabel y serio.

Miembronan di Asociacion di Prensa di Aruba ta spera cu pronto e agenda pisa di Altocomisario Vanessa Tjon lo permiti un reunion cu e directiva, pa por habri combersacion riba e topico importante aki. Mescos cu e rol di Polis ta proteha pa ley y ta considera nan e defensornan di ley, asina e rol di Prensa ta forma e pilar di democracia di un pais.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio