E siman aki lo tuma luga un reunion cu Minister President y Minister di Finansa riba e sosten di likidez cu Aruba ta ricibiendo for di Hulanda. Ta resalta e hecho cu Gobiernonan di Corsou y Sint Maarten a hiba consulta cu nan respectivo Parlamentonan prome di a firma cualkier acuerdo cu Hulanda pa loke ta e sosten financiero. Den e caso di Aruba, Parlamento di Aruba lo wordo scucha y informa despues cu ya caba Gobierno di Aruba a firma e acuerdo y a compromete Aruba cun’e.
Parlamento di Aruba tin e preocupacion di e detayenan du loke wordo firma: tin dos documento cu fraccion di AVP a manda pidi y nos no a ricibi esaki ainda. “Fraccion di AVP a manda pidi e acuerdo di fiansa firma cu Hulanda, como e carta fecha dia 30 di april ultimo pa CAFT y Conseho di Minister di Reino, den cual gobierno di Aruba ta trece e condicionnan cual e ta bay di acuerdo pa por haya fiansa”, asina Parlamentario Richard Arends a declara.
Den un declaracion di Minister Presidente a indica e reduccion di salario cu mester yega na 90 miyon florin mientras cu e gastonan total di personal ta rond di 480 miyon florin. “E reduccion di salario di empleadonan publico cu 12.5% y tambe di mandatarionan cu 25% ta duna un resultado di 60 miyon florin. Ta keda e ora e pregunta grandi con gobierno lo cubri e suma di 30 miyon.”
Den e carta di Secretario di Estado Knops na Parlamento Hulandes indica cu Gobierno a compromete su mes un un reduccion di gastonan di AZV cu 5 miyon mensualmente. Gastonan di cuido medico ta totalisa 450 miyon florin. Un suma di 60 miyon florin pa aña ta un suma cuantioso pues nos kier sa na unda mas ta bay wordo corta y con esaki lo afecta salubridad publico y cuido medico,” sr Arends a sigui mustra.
Gobierno a presenta un presupuesto pa aña 2020 cu un deficit di 1.3 biyon florin y te awor a haya financiemente pa solamente 100 miyon florin. A manda pidi Gobierno pa splica su pronostico di likides y con lo logra sera 1.2 biyon florin pa cual ainda mester haya financiamento. Parlamentario Arends ta ilustra cu den pronosticonan di Gobierno ta tene cuenta cu actividadnan economico lo ta paralisa te fin di aña. Sinembargo Gobierno mes – como participante den nos economia – ta presenta un scenario ‘business as usual’ pa su mes. Recientemente tambe a aproba presupuesto di DOW caminda cu e gastonan a keda mescos cu e situacion prome cu Covid-19.
Nos ta spera tambe di pronto ricibi mas detaye riba loke a wordo acorda y tambe kico ta e condicionnan cu ta spera pais Aruba pa loke ta trata e di tres trayect pa loke ta ‘loonsubsidie’ y tambe pa loke ta e sosten di likides pa pais Aruba,” Parlamentario Richard Arends a declara.
,