Paradera: Diadomingo anochi algo pasa di 10’or, por a mira e Helicopter ta draai banda di Misa di Paradera y tambe por a mira varios patruya di polis coriendo rond den Paradera. Esaki tabata pa un motociclista cu no lo a respeta ordo di polis, e no a para y a sigui core bay te su cas, cu ta keda na Paradera, un poco pazuid di e Santana.
Mientras cu varios patruya tabata na e cas di e hoben motociclista, pa deten’e, confisca e brommer y warda riba transport, un poco mas pabou na e kleuterschool Nos Paraiso ladronnan tabata fiestando, probablemente nan lo a drenta via e scol Basico Maria Goretti y a asina lo a bula den cura di e Kleuterschool. Eyden nan a kibra den un local y a bay cu tres flatscreen basta grandi y varios otro cos di importancia pa e scol.
E alarma mesora a bay on y bisiñanan a yama polis pero polis tabata hopi ocupa cu e motociclista y pa ora un patruya por a yega na e scol, e ladronnan a bay dia bieu caba for di e sitio cu e tres flatscreennan, saliendo for di patras di e scol dilanti di e misa net caminda e helicopter tabata draai rond.
Ora e polisnan a yega, ya e patruya di e compania di seguridad hunto cu e directora di e scol tabata na e sitio, nan a cana riba e tereno di e scol te cu nan a nota cu e scol a haya bishita di ladronnan. NO ta prome biaha cu e scol aki ta haya bishita di ladron, den pasado nobo nobo cu a haci e scol full airco, ladronnan a bay cu varios unit di airco nobo for di e scol aki.
Con por ta posibel cu mientras e ladronnan tabata den e Kleuterschool, helicopter tabata banda di e Misa di Paradera y no a nota nada straño y dicon ora bisiña a yama bisa cu e alarma a bay on, no a saca un patruya cu tabata ey banda mes y mandanan direccion di e scol, kizas nan por a logra garanan con la mano en la masa.
No ta tur ora un alarma bay on ta algo, pero nunca sa ki ora tin algo di berdad, pesey semper ta bon pa mesora bay tira un control of por a manda e helicopter di biaha un poco mas pazuid. Paso e alarma a bay on net ora cu e helicopter tabata banda di e Misa. Por ta detencion di e motociclista lo tabata tin mas prioridad pa polis cu un ladronicia di tres flatscreen na un Kleuterschool.