ORANJESTAD – Despues cu riba 6 di april ultimo Gobierno di Aruba a lansa un ‘Hotline’ pa Salud Mental, nos ta drentando awe den su ultimo siman. Dia 31 di mei binidero, 8 siman despues, ‘Hotline’ 281-0909 ta bay stop di existi.
‘Hotline’
‘Hotline’ 281-0909 a keda introduci pa e comunidad di Aruba en conexion cu COVID-19 y tur e consecuencianan cu esaki por trece cu ne pa un persona su salud mental. Si bo tabata sinti bo tristo, desespera, cu miedo of preocupa, por a yama tur dia e ‘Hotline’ na 281-0909 entre 2:00pm te cu 10:00pm y asina papia directamente cu un psicologo.
Union ta haci forsa
E servicio aki tabata consisti di un colaboracion di diferente instancia y profesionalnan manera Centro Multi Disciplinario (MDC), 3 psicologo di Respaldo y1 ortopedagogo di Departamento di Salud Publico (DVG), kende tur 4 a colabora boluntariamente y finalmente Departamento di Asunto Social (DAS) su seccion Bida & Famia kende tambe a coordina e servicio. Tabata tin diferente otro profesionalnan den sector priva cu tabata dispuesto pa yuda, pero den e caso aki no a mira e necesidad.
Resultado
Mayoria persona cu a yama e ‘Hotline’ tabata hende muhe di edad halto y tabata haci esaki entre 2:00pm cu 6:00pm. Mayoria yamada tabata relaciona cu COVID-19 y tabata sinti soledad, ansiedad, stress y depresion. Pa motibo cu mayoria caso tabata relaciona directamente cu COVID-19, segun cu e simannan tabata pasa, e necesidad pa yama y busca ayudo tambe tabata baha.
Pa dia tabata tin un promedio di 5 yamada di cual combersacion tabata tin un duracion di aproximadamente 16 minuut. Durante e prome 2 simannan tabata tin un promedio di 8 yamada pa dia cual a keda baha poco poco segun cu e simannan tabata pasa. E promedio di edad di esnan cu a yama ta 55 aña, e edad mas jong tabata 17 y e mas halto tabata 91 aña. E mayoria (87%) di personanan cu a yama tabata personanan regular pues sin un limitacion specifico. 3% di e hendenan tabata personanan den isolacion y/of cuarentena. Di cada 3 yamada, 1 tabata for di e districto di Oranjestad.
Final
Den luna di juni binidero, DAS lo bay publica e estadistanan mas detaya rond di e ‘Hotline’. DAS no kier keda sin duna danki na e diferente instancia y profesionalnan cu a brinda nan servicio na e comunidad di Aruba y ta confia di tabata un apoyo grandi na tur persona cu a yama.