Home » Parlamentario Shailiny Tromp-Lee (MEP): durante reunion di Comision Fiho di Labor y Sector Primario Representantenan di Union di Piscado a haci diferente peticion na Parlamento 

Parlamentario Shailiny Tromp-Lee (MEP): durante reunion di Comision Fiho di Labor y Sector Primario Representantenan di Union di Piscado a haci diferente peticion na Parlamento 

by Admin
0 comment 63 views

 

Dia 18 di mei 2020 como Presidente di Comision fiho Labor y Sector Primario mi a yama un reunion cu Union di Piscado. 

 

E reunion a keda yama a base di un carta habri cu sr. Arthur Giel (presidente di Union di Piscado y di Hadicurari) a pone riba Facebook dirigi entre otro na Parlamento. 

 

E reunion tabata uno cu a bay den bon ambiente caminda e Representantenan di e organisacion srs. Arthur Giel, Dirksz y Laurence a presenta diferente punto di preocupacion y desapunto. Alabes nan a entrega peticion specifico pa loke ta trata cambio di ley cu ta limita of perhudica e piscadonan. 

 

Nan a accentua e descontento creciente bou di piscadonan aki na Aruba. Nan ta sinti cu nan a perde tereno y a keda neglisha pa hopi aña. Durante reunion nan a enfatisa cu cada biaha ta bin cu mas prohibicion cu ta kita nan derecho y ta caba cu nan tradicion di piscamento. 

 

Nan a subraya cu nan ta contra prohibicion pero ta pro regulacion! Algo cu sigur Parlamento mester tin oido pe y mester bay sondea e posibilidad con pa crea e balance necesario caminda nos pais ta cumpli cu tratadonan y na mes momento ta percura pa salvaguardia e interes economico y custumber y tradicion di pesca y nos piscadonan. 

 

Como Parlamentario durante tratamento di presupuesto 2018 y 2019 mi a pidi atencion caba pa diferente puntonan cu nan a presenta y Gobierno a informa cu nan tabatin un

Comision cu ta traha riba esakinan. Lastimamente e resultado di nan trabou no a keda presenta ainda. 

 

Algun tempo atras gobierno anuncia cu nan lo bin cu cambio pa medio di un LBHAM pero esaki no a cristalisa ainda. Un punto cu sigur mi ta bay informa con leu e ta y pa ki tempo nan lo presenta esaki. Sigur mediante un LBHAM gobierno por trece e algun di e cambionan desea. 

Alabes mi ta bay follow up riba e trabounan di e comision aki riba menciona y mira con leu nan ta cu nan conseho y sugerencia. Alabes ta bay cuminsa  sondea e posibilidad pa duna oído na nan peticion pa bin cu un Ley di Iniciativa pa bin cu regulación na lugar di prohibicion. Den tur e procesonan menciona mi ta pidi pa den e trabou involucra e piscadonan cu sa mas di e materia y crea cu nan ta carga e cambio y trece e alivio necesario.

 

Durante reunion nan a trata entre otro e siguiente prohibicionnan durante reunion:

– A prohibi Calco, 1987

– A prohibi Turtuga, 1992

– A prohibi spearfishing, 2001

– A prohibi piscamento na Spaans Lagoen, 2014

– A prohibi varios especie marino, particularmente Gutu y Kreft, 2017

– Piscamento na baranca etc. 

 

Piscadonan ta di opinion cu piscamento ta nan tradicion, nan cultura y nan derecho. Piscamento ta un fuente di cuminda pa e pueblo humilde. E ta tambe pasa tempo pa grandi, chikito, pober y rico. Piscamento ta algo tipico y autentico riba nos isla, asta uza den masha hopi promocion turistico. 

 

Na mi opinion nos mester por crea un balance entre proteccion di nos naturalesa y e ofishi y tradicion di piscamento. Mi ta di acuerdo cu e ponencia cu Metanan di Desaroyo Sostenibel mes ta papia di seguridad di cuminda y combati pobresa y cu aki na Aruba nos ta indica cu piscamento sigur ta hunga un rol importante den esaki. Pa es motibo aki mes mi ta di opinion cu mester por crea e condicionnan necesario pa enberdad haci esaki posibel.

 

Na final di reunion nan a pidi nos pa nos intermediacion pa loke ta trata suavisacion di e ora di salida y yegada di piscadonan relaciona cu toke de queda, cual Gobierno a duna oído na e peticion specifico aki. 

Por ultimo nan a pidi atencion di Parlamento na e practica di buscamento di pisca for di botonan Venezolano. Algo cu sigur no por sigui keda tolera y cu como parlamentario mi ta bay pidi Gobierno pa duna e debido atencion pa preveni cu e practica aki por sigui continua.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio