Na momento cu Minister di Enseñansa no tin e curashi di sali bin dilanti y bisa e berdad di loke ta e cambionan cu e kier impone den enseñansa, esaki ta algo di condena y di lamente, lider di fraccion di AVP, sr Marlon Sneek a mustra diamars durante di conferencia di prensa.
No ta prome bes cu Minister en carga Rudy Lampe ta hunga e tipo di weganan cu cambionan cu e kier mira wordo ehecuta den enseñansa y mientras cu na varios ocasion su propio gobierno a para su decisionnan, ta mustra cu cueste loke cueste minister Lampe kier implemente cambionan sumamente cuestionabel.
“Tin cambionan cu Minister Lampe kier introduci na Colegio San Nicolas y referente na esaki, nos a bin haya copia di e ‘Ministeriele Beschikking’ cu e minister aki a saca, pa loke ta e cambionan cu e ta bay trece na Colegio San Nicolas.
Un ministeriele beschikking caminda por tuma nota riba dos punto di dje, cu Minister Lampe no ta sincero den loke e kier bay haci cu scol aki, caminda entre otro na articulo dos y letter D, ta bisa lo siguiente: ‘in het bijzonder waken over de rechtpositionele aangelegenheden van het personeel van Colegio San Nicolas, over di reorganisatie procedures en een eventueel overstap van de personeelleden naar de stichting Combina en op deze gebieden samen te werken met de departement Recurso Humano.’
Pues articulo dos inciso B ta bisa cu un di e puntonan cu stichting Combina tin cu traha riba dje, ta e traslado di e personal di DPS, ya cu e trahadonan aki ta cay awo bou di DPS, pa stichting Combina.
Minister Lampe ta para ariba cu nada ta bay cambia pero Ministeriele Beschikking cu e minister aki mes a traha, ta bisa bon cla cu den e caso aki, Colegio San Nicolas ta bay cambia di structura.
Lampe mes ta bisa den su ministeriele beschikking, articulo 2 D, e ta mustra cu ta bay tin un ‘overname,’ un ‘overstap’ di e docentenan cu aworaki ta trahando na Colegio San Nicolas pa e stichting Combina.
Loke por a tuma nota di dje den e mesun MB aki, ta caminda articulo 3 inciso B ta bisa: ‘beleidsregels te bepalen op vlak van onderwijs, financien, logistiek en HR, met diens verstand, dat de Minister in zijn hoedanigheid van bevoegdgezag, tot 31 Juli 2021 hirarchies, het hoogste beslissingsorgaan blijft.’
Cu otro palabra te cu 31 di Juli 2021, Minister Lampe ta keda esun cu ta bay tuma decisionnan ey y despues di e fecha ey e overname ta bay tuma luga, despues di eynan stichting Combina ta bay tuma Colegio San Nicolas over. Pa fraccion di AVP esaki ta lamentabel cu nos ta haya un Minister, cu cada bes ta hunga cu e pensamentonan aki.
Nos ta kere cu minister meste ta serio y si esey ta Lampe su maneho, esey ta locual e ta kere aden, anto bin dilanti y bisa pueblo cu bo ta kere ci ta di e forma aki mester haci’e, punto.
Pero no keda gaña, bira palabra y bisa cu tur loke ta saliendo na cla den ultimo dianan, no ta berdad.
Nos ta lamenta masha hopi mes ora un minister, kende ta un persona cu pueblo mester kere aden, pueblo ta mira cu cada bes Prome Minister tin cu bin dilanti y hala su decisionnan aden, y e cos aki a bira un custumber caba.
En realidad gobierno ta cabando cu enseñansa na Aruba y Parlamento di Aruba a pasa un mocion cu sosten unanime, den cual a tuma e decision cu DPS tin cu keda manera cu e ta, no mag di saca nada, niun Futura, niun di e scolnan cu e ta responsabel pe, wordo saca for bou di DPS, pero minister Lampe ta haciendo net lo contrario di e decision tuma aki pa Parlamento.
Sinembargo fraccion di AVP a bin ta bisando pa un tempo caba, cu minister Lampe ta comiendo e pisca na mochi, pida pida dor di split tur cos, keriendo cu ningun hende lo ripara of haya sa kico ta locual e ta haciendo,” lider di fraccion Marlon Sneek a declara.