Dakota: Diahuebs anochi den careda di 10’or, un dama basta burachi tras di stuur di un Mitsubishi Lancer shinishi numera A 65885, tabata na su cellular y den Caya Papa Juan Pablo(Rondweg) no lo por a distingui trottoir cu caminda. E la subi trottoir dal un Nissan March cu tabata staciona y a sigui core mane nada no a pasa.
Un poco mas pabou na altura di e cura di ex Kooyman e dama chauffeur a para su auto memey caminda y a cana bay bek ariba bay pa coy e bumper di su auto, cu den e impacto fuerte a kibra y a keda benta memey caminda.
Na momento cu e la bay coi e bumper, e bisiñanan a bise cu e tin cu para pa su responsabilidad y mester warda riba polis. E la cuminsa insulta y habri boca cu e personanan cu tabata bise cu e tin cu warda riba polis.
E dama chauffeur a pasa man pa su bumper y a cana bay bek na su auto. E dama tabata mustra basta bebi, pero tabata sa bon kiko e tabata haciendo. E la subi tras di stuur y kier a bandona e sitio, pero algun bisiña mesora a sigui e dama, kende no a yega mucho leu. Den Avenida Milo Croes dilanti Fergus Bar Restaurant e la para su auto y eynan polis a yega topa cu ne.
Na yegada polis mesora a ripara cu e dama chauffeur tabata hopi burachi y a detene. E dama a wordo transporta cu transportwagen di polis pa warda di polis caminda e lo a haya un cuarto gratis pa sosega su cansancio grandi di alcohol.
Despues cu transportwagen a hiba e dama pa warda di polis, E agentenan policial a bay den Caya Papa Juan Pablo II (Rondweg) pa tuma datos di loke a sosode y nan por a mira cu e Nissan March a haya hopi daño na e parti di wiel banda robes y dilanti tambe e impacto fuerte a pusha e auto riba un meter di Awa, caminda e bumper y wiel drechi tambe a haya daño.
