Iran su economia ta sufriendo pa motibo di COVID-19 y pa motibo di e prijsnan reduci di petroleo. Pa yega na entrada, e pais ta rebeldia contra sancionan Mericano. Venezuela ta den necesidad di gasolin pa asina mantene e calmo. Maduro purbando di evita cu e situacion economico y social di e pais bay for di man, a cumpra fuel for di Iran.
Algun tankero ta biniendo for di Iran, fuentenan ta indica cu ta un 5 tankero ta na caminda pa Caracas. E prome tankero lo por ta yegando Caribe e weekend aki. Merca tin algun sancion poni riba Iran, y e acto aki ta un supuesto violacion di e sancionan poni.
E gobierno di Presidente Trump no ta contento cu esaki. Asina mes Iran a duna di conoce cu e lo no kier bira e tankeronan bek. Iran a splica cu “si Merca, haciendo manera algun pirata, intenta di crea insiguridad den awanan internacional, e lo ta tumando un riesgo peligroso y esaki lo no bay sin represaya.”
Venezuela su embahador pa Nacionan Uni, Samuel Moncada, ta di pensamento cu cualkier intento di stroba e tankeronan di yega nan destinacion lo ta algo ilegal y un “crimen contra humanidad”. Venezuela su minister di defensa a informa tambe cu e 5 tankeronan lo wordo escolta pa e pais su militar. Avionan y botonan militar lo bay purba proteha e tankeronan for di posibel agresion Mericano.
E gasolin cu lo mester wordo entrega na Venezuela no ta un acto di caridad for di Iran, ta placa a ser paga. Ta ser bisa cu e banco central di Venezuela a haci un transferencia di algun miyones di dollars. Medianan Mericano ta bisa cu esaki ta fondonan cu a ser adkeri for di gruponan ocupa cu crimen organisa.
Sinembargo, e transaccion aki por trece mas tension ainda entre Venezuela y Estados Unidos. Mester nota cu no ta promer biaha cu Iran ta haci negoshi cu Venezuela. Un aerolinea di Iran, bou mando di e gobierno, lo tawata bulando caba algun tempo supuestamente treciendo equipo y articulonan pa Venezuela.
E equipo treci tawata wordo uza pa reparacion di makinaria di e pais su rafinaderia mas importante den e area di Paraguana. Estados Unidos ta prohibi companianan Mericano pa bende gasolin cu Venezuela, pero no tin prohibicion riba benta for di otro fuentenan no-sanciona.
Iran su embahador na Venezuela, Hojjatollah Soltani, ta di punto di bista cu e dos paisnan ta liber y tin derecho di haci negoshi cu otro. Ambos pais ta bou sancionan severo for di Merca, y esaki tin impacto fuerte riba nan economia.
Merca tin e poder pa pidi e tankeronan regresa Iran o pa hasta confisca e carga valioso cu ta abordo. E comunidad internacional ta pendiente pa mira con e caso aki lo sigui desaroya.