Compania Serlimar a bay Corte pa pidi Hues pa un proteccion contra companianan cu Serlimar debe, pa nan no pidi bancarota y asina permiti Serlimar sigui duna servicio na comunidad.
Parlamentario Arthur Dowers di fraccion di AVP a mustra cu e desaroyo negativo aki, no ta ningun sorpresa, ya cu for di comienso di e periodo di gobernacion di e actual gobierno, tur hende tabata sa cu Otmar pa su cuenta y Evelyne pa su cuenta.
“Simplemente mester tabatin un gobierno sin partido AVP y e resultado ta bisto awor, caminda a permiti Minister Oduber haci y deshaci manera cu e tabata desea.
For di inicio nos a yega di spiera pueblo riba situacion aki y cu awe ta marca historia negativo pa nos pais, ya cu partido MEP semper a ataca Otmar Oduber catalogandos u persona como un mandatario corupto y hasta a bay Minister Publico pahaci denuncia contra di su maneho.
Pa forma gobierno nan a forma un pacto cu nos ta considera un pacto diabolico caminda e dos partidonan di MEP y POR lo a dicidi cu otro cu un ta tuma un banda y e otro ta tuma e otro banda y nan no ta mete den asunto di otro y tur dos lo keda keto riba otro.
Tempo cu Otmar a bin den gobierno, AVP a denuncia e hecho cu su persona kier a pone DTI bek den e edificio na Pos Chikito pa asina doño di e edificio, por a sigui cobra miyones pa huurmento di e edificio.
Ora cu Hues a para e decision aki di e minister aki, Oduber a dicidi di bay kibra Serlimar y pone e compania aki den e edificio na Pos Chikito y laga e compania aki bay paga e cantidad di placa cu realmente Serlimar no tabatin y cu pueblo tampoco tabatin.
Na varios ocasion minister Oduber e tempo ey a bin Parlamento pa yora pa haya aprobacion di Parlamento pa e haya placa pa cubri gastonan cu el a ocasiona cu su maneho di Serlimar.
E minister aki a bin Parlamento, pinta tur cos bunita pa Serlimar, yora cu e tin mester di placa, convence casi henter fraccion di MEP pa e por sigui haya mas placa pa cubra gastonan di Serlimar y awe e berdad ta saliendo na cla.
Pueblo por corda cierto miembronan di fraccionnan cu ta sostene e actual gobierno, con nan a elogia e plan di Minister Oduber pa cu maneho di Serlimar pero na dos ocasion a dune e subsidio cu el a pidi pero awe e persona aki a dicidid i bula afo, laga henter e poto poto pa un colega Minister y Serlimar den problema serio caminda hasta mester a pidi proteccion di Corte pa e no wordo declara bancarota.
Mescos cu fraccion di AVP a culpa MEP di ta responsabel mayor den e problemanan cu ta asotando enseñansa actualmente, nos tin cu punta dede atrobe riba partido MEP ci a sinta mira e cosnan aki pasa, aplaudi maneho di e minister mientras cu nan mes a tilda e ex minister aki di ta corupto y a entrega keho contra di su persona.
Ta fraccion di MEP na dos ocasion a dune placa pa e hinca den Serlimar pero awe e compania ta den problema serio, nan a sinta scucha e bunita palabranan di Minister Oduber durante di e reunionnan riba Serlimar, a bay di acuerdo pa e haya mas placa y awe Serlimar ta den un situacion hopi serio y delicado mientras cu Minister Oduber mes no ta minister mas,” Parlamentario Arthur Dowers a declara.