Dia 20 di juli 2014 CAFT a traha su prome rapport riba e situacion financiero di Aruba. Den 21 rapport entre juli 2014 te cu december 2017 tabata tin un liña cora den e rapportnan di CAFT cu ta:
- e situacion financiero di Aruba mester di un restructuracion sostenibel y duradero!;
- cifranan IR-REALISTICO tabata wordo usa; y
- cu e gastonan di personal y di AZV ta mucho halto y cu esakinan mester ser baha.
Sinembargo cada bes di nobo e oberservacionnan aki di CAft usualmente tabata wordo interpreta segun loke tabata cumbini cada partido politico y despues ta hinca esaki den lachi. E gobiernonan tabata sali for di e punto di bista cu “papier is geduldig” y cu nan por a sigui goberna “CON CU TA” sin ningun tipo di sancion.
UPP como partido di oposicion sin representacion den Parlamento, particularmente desde 2014 a bin ta mustra cada bes, cu lo yega un momento cu e practica aki lo hiba nos den problema grandi cu Hulanda y cu e deblace financiero lo bira peor. Y ta p’esey na 2014 UPP a sugeri pa bin cu un Dialogo Nacional pa yega na un Compromiso Nacional cu lo percura pa introduci reglanan estricto di Good Governance cu e solo meta pa mara man di e politico. Y marando e man di e politiconan, nos pueblo lo wordo conscientisa tambe cu nan no por bay tras di promesanan falso di politiconan.
UPP for di e tempo ey tabata bisa cu ta asina SO nos por “GET RID” di Caft y recobra nos autonomia financiero manera cu nos a logra na 1986 ora cu nos a drenta den e Status Aparte. Esaki pasobra NOS mes kier esaki y no paso Hulanda kier. Y mustra mundo cu nos ta MERCEDOR di nos autonomia.
Fin di 2017 a bin e gobierno POREDmep. Desde cu e gobierno aki a sinta Caft a produci 19 rapport. E 3 puntonan ariba menciona cada bes atrobe ta bin padilanti y atrobe a sigui ignora e consehonan, loke a conduci na un postura mucho mas estricto di Hulanda. E exigencianan hulandes a tuma un paso mas contudente awor cu Aruba atrobe a pidi ayudo pa sobrevivi COVID-19. Y enbes di cera cabes y logra un consenso of Compromiso Nacional, por medio di un Dialogo Nacional, e gobierno conforma e.o. pa e partido cu a hiba un lucha tenaz pa logra e Status Aparte, unilalateralmente a haya ta necesario pa di un forma dictatorial exclui gremionan y hasta Parlamento for di e decision cu ta nifica un peliger iminente di nos Status Aparte.
Dia 20 di mei 2020 e debate den Parlamento Hulandes encuanto e ayudo financiero na e Islanan a mustra masha cla cu de facto Caft t’ey pa keda y cu eta mas fuerte cu nunca. Te hasta un biaha mas a pone Parlamento un banda!! Nos por scucha un presidente di Parlamento hopi hostina y un lider di fraccion di partido mas grandi di coalicion ta haya cu e rol di Hulanda ta uno cuestionabel. E duo ta nenga di realisa cu ya caba desde november 2018, Parlamento a wordo “buiten spel gezet” dor di e gobierno POREDmep cu nan ta sostene ciegamente. Y awe kier tira culpa riba otro? Awe kier sigui cu e mesun cantaleta? Awe kier sigui polarisa? Dicon no a exigi nan gobierno pa stop di goberna nos pais “CON CU TA”??
Lamentabelmente e “lachende derde”, malusando e situacion di COVID-19, ta Hulanda, “cu ta bay cu e weso” ora cu e pueblo ta dividi. Ta hopi obvio cu e polarisacion aki lo no caba pa awor tampoco.
UPP te ainda ta kere cu por para e rumbo DESASTROSO aki y atrobe ta haci un apelacion pa mas liher cu ta posibel convoca un Dialogo Nacional pa yega na un FRENTE NACIONAL manera a ser haci na añanan 80 na unda nanishinan tabata den mesun direccion y cu a percura pa Aruba por a haya su deseo tan anhela cu ta su STATUS APARTE.
Prome cu nos cuminza punta dede riba otro, ban acepta cu NOS tur ta un poco culpabel!!! Manera ta ser bisa cu si bo kier drecha algo, bo mester cuminza acepta cu bo a faya. Y esaki ta conta pa tur esnan cu a goberna e pais aki, sin excepcion. Esaki ta nifica TUR partidonan politico, gremionan, Hulanda etc.etc. Y mi kier como prome pa acepta mi culpabilidad.
Aceptando esaki y cu e disponibilidad trece cambionan REAL , UPP desde su fundacion tabata y ta bogando pa nos hunto RE-DISEÑA e rumbo di nos gobernacion!
COVID-19 a mustra nos con malo nos ta para y no tin confianza cu cos lo cambia! Y for di e debatenan den 2de Kamer nos por a saca afo cu no tin confianza den e islanan tampoco. Prueba di esaki ta cu te hasta lo bin un entidad nobo, totalmente dirigi pa Hulanda, cu lo bai maneha e placa cu ARUBA ta fia y cu ARUBA mester paga back. Dicon e desconfianza aki? Desde 2014 a priminti y a acorda cu Hulanda algo, pero a scohe pa e.o. NO haci nos finanzas publico sano y sustenibel, a keda usa cifranan IRREALISTICO y a sigui AUMENTA e gastonan di personal! Y awe nos nanishi a wordo primi riba e realidad!! Nos mester realisa cu no por sigui goberna nos pais CON CU TA!!
Aunke por tin comprension pa e postura di “politiek Den Haag”, UPP ta di opinion cu e postura aki ta uno cu por ser cualifica como uno “Neo-Colonialista”!
Sinembargo si desde 2014 a percura pa mara mannan di e politiconan, awe nos no lo cay den gara di e politica neo-colonialista aki! Si antes a colonisa paisnan cu “kraaltjes en spiegeltjes”, awe Hulanda ta zwaai cu e saco di placa dilanti di un pueblo den un incertidumbre enorme!! Ban UNI awor. Corda dividi nos lo ta debil, pero den UNION nos lo para e tendencia neo-colonial aki. Nos arma fuerte lo mester ta: E COMPROMISO NACIONAL!!