ORANJESTAD, Aruba –Den e conferencia di prensa di dialuna 18 di mei Pediatra dr Wicha Ponson tawata presenta pa splica un poco mas riba e topico di Covid-19 y salud di mucha. Segun dr Ponson e ta compronde cu hopi mayor ta precupa y tin pregunta y cu p’esey e tey pa contesta e preguntanan.
Segun dr Ponson Aruba a haci un tremendo trabou den maneho di e virus. Den su presentacion e dr a ilustra y haci comparacion entre Aruba, Italia y Hulanda pa loke ta e situacion di Covid-19 basa riba cada 1000 habitante, unda cu e informacion cu nos tin ta duna di conose cu na Aruba nos ta den un situacion hopi safe na e momentonan aki.
Mucha y Corona Virus na Aruba.
Dr Ponson a informa cu na Aruba di e 101 casonan positivo 5 tawata mucha bou di 14 aña. E mucha mas chikito tawata tin 6 aña y esun mas grandi 13 aña. Tur e muchanan aki a wordo contagia pa un adulto y tur a presenta sintoma hopi leve di keintura, tosamento y dolor di cabez. Tur e sintomanan por a wordo trata cu un resept di dokter y ningun di e muchanan mester a wordo interna den hospital.
Kawasaki y Corona Virus.
Dr Ponson a sigui splica tambe cu Kawasaki disease ta un malesa no comun cu ta manifesta su mes serca muchanan bou di 5 aña y cu na Aruba nan ta mira Kawasaki disease un biaha den dos pa tres aña. E sintomanan ta varia entre keintura halto mas cu 5 dia, rash, wowo y/of lip cora y kliernan hincha den nek. E complicacion mas grandi cu Kawasaki por trese cu ne ta problema di curazon. Pero tin tratamento cu remedi pa e malesa aki y por bisa cu mayoria mucha ta recupera hopi bon. Pa loke ta informacion cu ta circula riba medionan sociaal tocante posibel aumento di casonan di Kawasaki-LIKE syndroom relaciona na covid-19, dr Ponson ta infatisa cu esaki no ta conforma ainda y cu tin investigacion andando riba e casonan aki. Mirando cu mundialmente e casonan di Kawasaki ta relativamente abou den paisnan cu tin epidemia grandi y mirando e cantidad di casonan positivo di covid-19 na Aruba cu ta hopi abou, mayornan no mester tin miedo cu esaki por pasa cu nan yiu(nan).
Awor cu scolnan ta bay habri mayornan ta puntra si nan yiu(nan) ta safe na scol. Por bisa cu Pediatranan di Aruba a consulta asocacionan Internacional di Pediatra na Hulanda cu ta Nederlandse Vereniging voor Kindergeneeskunde (NVK) pa haya sa nan punto di bista riba e topico aki. Segun NVK e rol di mucha den plama of transmiti e virus ta hopi abou casi nada. Tambe ta wordo menciona cu e virus di Covid-19 serca mucha ta un malesa hopi leve y cu e risico di complicacion ta hopi abou hasta pa muchanan cu malesanan cronico manera astma of diabetes. Esaki tawata visibel tambe serca e casonan na Aruba.
Tambe a consulta cu asosacion di Pediatra na Merca cu ta American Academy of Pediatrics. Nan a publica criteria pa habri scolnan bek. Un di nan criterianan ta cu e epidemia local mester ta bou di control, mester tin un sistema di test, monitor y di contact “tracing” loke ta e situacion na Aruba actualmente. Pa por habri scol ta nesesario pa tin medidanan di prevencion “in place” manera por ehempel labamento di man, venitlacion y un sistema di screen y monitor di alumno y staf ora nan ta malo. Tambe a duna ehempelnan di con por regla un poco e distanciamento un poco entre alumno y docente door di haci klasnan mas chikito, parti e pauzenan of laga e docentenan cambia di klas envez cu e alumnonan ta keda cana y cambia di docente. Esakinan tawata algun di proposicionan di Merican Academy of Pediatrics pa habri scol.
Dr Ponson a caba su presentacion informando cu e conclucion ta cu e situacion na Aruba na e momento aki ta bou control, riesgonan pa mucha ta hopi abou, ta safe pa muchanan ta na scol y esaki ta un indicacion pa nos cu ta e momento pa nos habri scolnan bek pero mas cu claro aplicando medidanan di prevencion y tambe traha na un plan B den caso cu mester bin un lock down bek den futuro.